VOV4.Xơ Đăng - Đại tướng Võ Nguyên Giáp “Ngế ngoh rơmúa” dêi Khu lêng Việt Nam, ngế ki cheăng ‘na lêng, ngế ki cheăng ‘na kal kí, ngế ki cheăng tơpui kâ kân châ kuăn pơlê tung lâp tơnêi têa ƀă kong têa ê hâk mơjo. Tơdroăng cheăng, hnoăng cheăng pêi ƀă ngế ki djâ troăng ahdrối ‘na túa rêh ối, hiâm mơno dêi Đăi tươ̆ng hiăng chiâng môi to um meăn ki ôh tá chiâng hlâ tung hiâm mơno rêm ngế kuăn pơlê Việt Nam.

Khu lêng kring gâk Mố đô̆i gâk tíu tơkăng kong Kon Tum tơrŭm ƀă khu lêng Mố đô̆i gâk tíu tơkăng kong Tây Ninh nếo tơkŭm tŏng xo, djâ vêh dêi ngi tơnêi têa tơƀrê ngế o Y Liên tro hêak tê ngi kong têa Kul ƀă rơkong ki tơhrâ tơdroăng cheăng hiâ kâ liăn hên. Mâu tơdroăng klâi ki hiăng trâm ƀă o Y Liên ăm hlo dế ai hên mâu tơdroăng ki tro hlôp tâ tá ngế hơnăm ối nếo ki ôh tá hlê plĕng, tá hâi rơkê tung tơdroăng rêh ối ƀă ôh tá ai tơdroăng ki hbrâ kơchăng.

Mơhé 27 hơnăm hiăng hluâ laga tung tuăn ngôa dêi pôa Dương Minh Thuận (Kăn phŏ pơtâng tối tơdroăng kal kơvâ cheăng Đảng kong pơlê Lạng Sơn) xuân ối pâ ôh tá kâi piu um méa Đăi tươ̆ng Võ Nguyên Giáp a plông tơ’noăng Bắc Sơn kơxê hâi mê nah. Pôa Thuận cho ngế phiu ro châ tơdah Đăi tươ̆ng Võ Nguyên Giáp a chêng kông tơƀai trưk thăng kơxê lơ 26/9/1995 drêng Đăi tươ̆ng vêh pôu pơlê xiâm Bắc Sơn – kơpong Tơniăn dêi Tơnêi têa tung rơxông tơplâ xâ Pơhlăng. Kơxo hâi kơ’nâi, Đăi tươ̆ng hiăng ai roh tơpui tơno ƀă vâi krâ kuăn pơlê mâu hdroâng kuăn ngo ƀă mâu khu lêng:

“Đăi tươ̆ng pơchân Bắc Sơn cho tơring hiăng ai khôi túa Kăch măng, laga thế mơ-eăm vâ xăm kơklêa kơdroh kơtiê, mơ-eăm xông vâ pro kro mơdrŏng. Ƀă klêi mê, Đăi tươ̆ng kơ-êng Đảng ƀô̆ Kuăn pơlê Bắc Sơn hôm môi tuăn há, lâp plông kơtú ƀalong mơhé ôh tá ai kơbố djâ tiâ tơdrêng laga pơrá tiâ tơdrêng môi tuăn, tơkêa ƀă Đăi tươ̆ng. Drêng mơgêi ƀai xông tơpui a leh mitting, Đăi tươ̆ng hiăng koh vâi krâ kuăn pơlê ƀă nâl hdroâng kuăn ngo dêi mơngế Tày Bắc Sơn’’.

Mâu kơtâ um ‘na Đăi tươ̆ng Võ Nguyên Giáp xup hiăng ton nah laga xuân ối ai ki krih tơviah dêi kăn lêng dêi hdroâng mơngế

A Tíu chôu ‘măn tơmeăm khoăng ton nah xông tơplâ xâ Bắc Sơn nôkố xuân u ối rak hên chư chêh, um drêng Đăi tươ̆ng Võ Nguyên Giáp lăm pôu Bắc Sơn hơnăm 1995 rơtế mâu rơkong pơchân khu lêng ƀă kuăn pơlê Bắc Sơn thế ‘’mơnhông mơdêk khôi túa lĕm pơlê xiâm ngoh khên tơnôu, mơjiâng tơring chiâng môi tơring djâ troăng ahdrối dêi kong pơlê’’; Loăng ‘’hrá pro tơdroăng rêh ối ai tŭm tơmeăm” châ Đăi tươ̆ng pêt a hâi ki mê nah, nôkố xuân troh lâp lu rơngiâp tung kơdrum Tíu chôu ‘măn tơmeăm khoăng ton nah.

Nâ Phạm Thị Thanh Hà, kăn ƀô̆ Tíu chôu ‘măn rak vế tơmeăm khoăng ton nah xông tơplâ xâ Bắc Sơn, rơrêk tung hiâm mơno:

‘’Tíu chôu ‘măn tơmeăm khoăng ron ton nah cho 1 tíu troh kăch măng dêi tomối drêng troh ƀă Bắc Sơn. Kố cho mâu hlá mơ-éa kal ki xiâm ki kăn ƀô̆ tíu chôu ‘măn rak vế tơmeăm khoăng ton nah hiăng tăng rah ƀă rak vế, kum hnê khôi túa lĕm tro ăm mâu râ kuăn pơlê, ki rơhêng vâ tối cho rơxông ối nếo đi đo pâ vế ƀă pâ tung hiâm mơno hnoăng kân kĭn dêi mâu ngoh khên tơnôu.

Kố xuân cho tơdroăng phiu ro dêi Đảng ƀô̆, khu râ kăn pơkuâ ƀă kuăn pơlê mâu hdroâng kuăn ngo tơring Bắc Sơn drêng châ Đăi tươ̆ng troh lăm pôu. Tơmối troh akố hmâ ai kơ-êng hên ‘na Đăi tươ̆ng, ki rơhêng vâ tối cho mâu vâi o hok tro, mâu vâi o hâk vâ ‘nâi, hâk vâ châ ti tăng plĕng ‘na Đăi tươ̆ng Võ Nguyên Giáp’’.

Kăn ƀô̆ Tíu chôu ‘măn tơmeăm khoăng ton nah xông tơplâ xâ Bắc Sơn tơbleăng troh tơmối loăng Hrá châ Đăi tươ̆ng Võ Nguyên Giáp pêt hâi lơ 27/9/1995

Vâ chê 10 hơnăm Đăi tươ̆ng vêh ƀă mâu khu ngế hiăng khên tơnôu hlâ tung tơplâ xâ ăm tơniăn krê dêi tơnêi têa. Pêi pro rơkong pơchân dêi Đăi tươ̆ng, vâi krâ mâu kuăn pơlê hdroâng kuăn ngo ƀă kăn ƀô̆, mâu khu lêng Bắc Sơn rơtế dêi pó rŭm môi tuăn, mơ-eăm mơnhông mơdêk cheăng kâ – rêh ối pơlê pơla, gâk kring tơniăn cheăng lêng a kơpong tơnêi pơlê xiâm kăch măng.

VOV Đông Bắc chêh

A Sa Ly tơplôu ƀă tơbleăng