Kơxo lơ 21/4, a pơlê kong kơdrâm Ƀuôn Ma Thuột, Vi ƀan hnê ngăn kong pơlê Dak Lak, Khu ngăn Mâu ngế ki pâ nhuô̆m tơnêi têa tơkŭm po kân krip leh tơbâ 50 hơnăm kơ’nêi mâu ngế ki tro kroăng phâk tiô tơkêa Paris (1973 – 2023). Veăng ai mâ a leh tơbâ ai lối 150 ngế cho mâu ngế ki tro kroăng phâk, mâu ngế tro kroăng phâk ‘na tơdroăng kal kí tro xâ rup tung rôh tơplâ xâ Mih tŏng xo tơnêi têa.

A leh tơbâ, mâu kăn hiăng rơtế dêi rơpó hơ’muăn khôi túa tơplâ khên tơnôu dêi mơngế lêng kăch măng Việt Nam. Teăng mâ kăn pơkuâ kong pơlê Dak Lak hiăng pơtroh rơkong mơnê troh mâu ngế ki tro kroăng phâk pâ nhuô̆m tơnêi têa, rơhêng vâ vâi pơtối pleăng, hnê tơdjâk tơdroăng mơjiâng rak vế Tơnêi têa. Tơdrêng amê hlối pơtroh rơkong kơ-êng troh mâu nhŏng o, pú hmâ ƀă hbru tơmeăm ăm mâu ngế ki tro khu xâ rup kroăng kố.