VOV4.Xơ Đăng - Kong pơlê Dak Lak dế tơkŭm po apoăng tíu ki hơ’lêh kơxô̆ râ cheăm a cheăm Hòa Phú, pơlê kong kơdrâm Ƀuôn Ma Thuột prế cheăm Phú Lộc, tơring Krông Năng. Mâu tơdroăng ki kal ‘na hơ’lêh kơxô̆ dế châ tơbleăng a 2 to cheăm ki pơkâ dêi Dak Lak, mê cho: mơjiâng Khu kăn pơkuâ kơxô̆; mơnhông cheăng kâ kơxô̆; mơnhông pơlê pơla kơxô̆.

Tíu pơkâ hơ’lêh kơxô̆ râ cheăm a Dak Lak

Tơkŭm tung mâu tơdroăng cheăng trâm mâ ƀă kuăn pơlê; hnê hriâm rơkê; khăm pơlât rơkê ƀă mơđah tơbleăng inâi cheăm. Klêi kơ’nâi vâ chê 1 khế tơbleăng, kăn pơkuâ 2 to cheăm pêi pro tíu pơkâ hiăng rế hía rế mơdêk hnoăng cheăng pơla kuăn pơlê, khu mơdró kâ ƀă khu kăn pơkuâ. Tung mê, tŏng kum ăm kuăn pơlê, khu mơdró kâ châ xúa tơ’lêi hlâu má môi mâu tơdroăng ki xúa, tơdroăng ki pêi pro ai pơxúa, vâ mơdêk tơdroăng rêh ối liăn ngân, hiâm mơno ăm kuăn pơlê.

Katarina Nga tơplôu ƀă tơbleăng