Hâi lơ 6/6, Vi ƀan hnê ngăn kong pơlê Dak Lak tơkŭm po rôh hôp tiah hmâ khế 5/2023. Ing mê ăm hlo, tơdroăng ki nâp liăn ngân a kong pơlê hrá khât. Hơnăm kố, kong pơlê Dak Lak châ tơdroăng pơkâ nâp liăn châ 10.100 rơtal liăn. Laga, tung 5 khế apoăng hơnăm, nâp liăn ngân tơnêi têa tiô riân châ lối 3.400 rơtal liăn, kơdroh 13% tâng pơchông ƀă khế kố hơnăm hdrối.

Tiô tối tơbleăng tung la ngiâ, nâp liăn tơnêi têa a kong pơlê pơtối trâm hên xơpá, pơloăng mơnúa. La ƀă ivá khŏm mơ-eăm pêi klêi hnoăng cheăng nâp liăn ngân tơnêi têa hơnăm 2023, Khu ngăn liăn ngân Dak Lak kô mơdêk pơkuâ ngăn nâp liăn ngân tơnêi têa, tí tăng tơƀrê mâu kơxô̆ liăn sap ing liăn tê tơnêi, kế tơmeăm khoăng tung kơdâm tơnêi.

Pơkâ mơ’no mâu troăng hơlâ séa ngăn tung tơdroăng ki hrê liăn ngân. Tơrŭm ƀă Khu ngăn nâp hnoăng liăn mơhá kong pơlê teăm tí tăng ‘nâi plĕng ăm Vi ƀan hnê ngăn kong pơlê mâu troăng hơlâ pơkâ nâp liăn ngân tơnêi têa a kong pơlê, vâ rak vế tơniăn, nâp tro, nâp tŭm, nâp teăm tơdrêng mâu tơdroăng pơkâ nâp hnoăng liăn mơhá tiô pơkâ tung liăn ngân tơnêi têa.