VOV4.Xơ Đăng - Kơxo lơ 12/10, Hngêi arak liăn Tơnêi têa Việt Nam tíu pêi cheăng a kong pơlê Dak Lak tơkŭm po Hneăng hôp tơdjêp ƀă hngêi arak liăn – khu tê mơdró vâ thăm pêi pro tơdroăng tŏng kum liăn rơkâ ing hngêi arak liăn Tơnêi têa ƀă mâu kơxô̆ liăn mung dêi khu tê mơdró, khu tơrŭm cheăng, rơpŏng tê mơdró tiô Pơkâ kơxô̆ 31/2022 dêi Chin phuh.

Tâi tâng Hneăng hôp

Tiô tơbleăng dêi Hngêi arak liăn tơnêi têa tíu pêi cheăng kong pơlê Dak Lak, hluâ 5 khế pêi pro, mâu hngêi arak liăn tê mơdró hiăng tơbleăng pơkâ tung khu; tơkŭm po hnê tâi tâng mâu ngế pêi cheăng troh rêm tíu pêi cheăng, ƀơrô mơdró; séa ngăn mơngế ối tung mâu kơvâ cheăng châ tŏng kum liăn rơkâ; hbrâ tối tơbleăng tơdroăng, pơtâng tối troh mâu ngế krê, khu tê mơdró ƀă khu tơrŭm cheăng ƀă hía hé.

Pôa Trần Ngọc Duy, Kăn pơkuâ Hngêi arak liăn Tê mơdró Tơlo liăn mơ’no liăn mơnhông mơdêk Việt Nam tíu pêi cheăng a kong pơlê Dak Lak xông tơpui a Hneăng hôp

Laga, tơdroăng châ tơƀrê pêi pro tá hâi môi tiah pơkâ. Troh hâi lơ 30/9/2022,kơxô̆ liăn ăm mung tŏng kum liăn rơkâ tiô Pơkâ kơxô̆ 31 a Dak Lak nếo châ lối 50 rơtal liăn, kơxô̆ liăn hiăng tŏng kum liăn rơkâ lối 13 rơtuh liăn. A hneăng hôp, mâu kăn teăng mâ mâu Hngêi arak liăn tê mơdró ƀă khu tê mơdró hiăng veăng kum mâu tơdroăng pá puât tung mơnhên tơdroăng rêh ối, mơngế châ kơxô̆ liăn tŏng kum liăn rơkâ, chiâng ai tơdroăng tŏng kum tá hâi châ tiô tơdroăng pói vâ.

VOV Tây Nguyên/Tơplôu: A Sa Ly