Rôh tơ’noăng mơgêi hriâm râ má pái hơnăm kố 2023 tiô tối hdrối sap hâi lơ 27- 29/6/2023. Hơnăm kố Dak Lak ai lối 21 rơpâu 100 ngế hok tro chêh inâi tơ’noăng, tung mê, ai lối 610 ngế ôh tá plah tơ’noăng hơnăm nah mot tơnoăng nếo. Kong pơlê Dak Lak pơtối po 32 tíu tơ’noăng ƀă 886 veăng tơ’noăng tung 15 tơring, pơlê krâm ƀă pơlê kong kơdrâm.

A rôh hôp tơbleăng tơdroăng cheăng hbrâ tơkŭm po tơ’noăng hnăm 2023, hâi lơ 22/5, Khu hnê mơhno tơ’noăng mơgêi hriâm râ má pái phôh thong kong pơlê Dak Lak hnê mơhno mâu tíu pêi chăng, kơvâ cheăng ƀă kong pơlê thế hbrâ nhên hneăng tơ’noăng mơgêi râ má pái phôh thong, malối tơniăn kơxô̆ hok tro a mâu pơlê cheăm hngế hngo, kơpong xahpá hiăng ăm ‘nâi tŭm tơdroăng ‘na ko ƀai tơ’noăng.

Tơbleăng a rôh hôp, jâ H’Yim Kđoh - Kăn phŏ hnê ngăn Vi ƀan kong pơlê Dak Lak, Ngế pơkuâ hnê mơhno râ kong pơlê pâ thế rêm râ, kơvâ cheăng mâu  tơring, cheăm tung kong pơlê kal mơdêk tơrŭm, hbrâ mơjiâng troăng rơhlâ pơkâ tơ’noăng, bro nhên, ai pơxúa, rak tơniăn rôh tơ’noăng, tơƀrê, kơtăng, tro tiô luât pơkâ.