Vâ rêm ngế ki tâ phĭu pơrá ai phĭu vâ rah xo teăm tơdrêng ƀă tro pơkâ, Kŏng an kong pơlê Dak Lak mơnhên séa ngăn, chêh inâi mâu ngế ki tâ phĭu cho tơdroăng ki má môi kal khât. Tíu cheăng hiăng hbrâ tơrŭm krá ƀă Vi ƀan tâ phĭu mâu râ tung tơdroăng pêi pro chêh, séa pơchông ƀă chêh tơ’mot ‘noăng chư chêh kuăn pơlê.

Ki xiâm cho pêi pro tơdroăng ki chêh ‘noăng chư chêh, tơdâng tơ’mô tơdroăng ing tíu ‘măn ‘noăng chư chêh tơnêi têa ‘na kuăn pơlê, ing mê kơdroh iâ má môi ki xôi, bô bối lơ châ lôi mơngế ki tâ phĭu.

Tơdroăng xúa ‘noăng chư chêh ôh tá xê to mơdêk ki tơtro păng ‘nâng, tơdrăng tung chêh inâi mơngế ki tâ phĭu, mê ối pro tơ’lêi hlâu tung in, xing xoăng theh ngế ki tâ phĭu, tơniăn rêm ngế kuăn pơlê chiâng vâ  pêi pro hnoăng tâ phĭu. Kŏng an kong pơlê hiăng hnê mơhno kŏng mâu cheăm, bêng hlê plĕng pêi pro, hbrâ pêi pro tŭm tơdroăng xing xoăng theh mơngế tâ phĭu veăng tâ phĭu; tơdrêng amê tơrŭm ƀă Viƀan tâ phĭu pêi pro tro mâu troăng hnê mơhno dêi Kơ koan xiâm pơkuâ mơ-éa ‘na tơniăn pơlê pơla.

Troh nôkố, Viƀan tâ phĭu mâu cheăm, bêng hiăng chiâng vâ tơdah, pơhlêh, pro mâu file ‘noăng chư chêh, tơrŭm krá tơniăn tung tơdroăng xúa kŏng ngê̆ chêh ‘măn ‘noăng chư chêh kuăn pơlê ƀă in theh mơngế ki tâ phĭu tro tiô hdrối kơ’nâi, mơ-éa ƀă hâi khế pơkâ’’.

Kŏng an kong pơlê Dak Lak hiăng tơkŭm po lo lăm pêi cheăng, mơjiâng 10 tôh pêi cheăng ƀă lối 300 kăn ƀô̆, mâu lêng tơdrêng chu 102 cheăm, bêng vâ ‘nâi tơdroăng, teăm tơdrêng tơleăng mâu tơdroăng ki nếo ai, ki má lối cho mâu tíu ki xiâm.