Khu pơkuâ kuăn pơlê pêi chiâk deăng Dak Lak nếo tơkŭm po tơdroăng tơdjêp troăng klông, mơđah tơbleăng ƀă tê tơmeăm pêi lo ing chiâk deăng, mơhnhôk mâu ngế mot tơrŭm, kuăn pơlê pêi chiâk deăng ƀă mâu khu tơrŭm cheăng veăng. 650 tơmeăm ki xiâm, ki má môi ƀă OCOP châ mơđah tơbleăng a 34 tíu mơđah tơbleăng, pro rôh tơ'lêi hlâu tơdjêp tơdrêng ƀă khu mơdró kâ ƀă mơngế ki rôe xúa. Ki rơhêng vâ tối pakĭng mơđah tơbleăng tơmeăm tơdrêng, kuăn pơlê pêi chiâk deăng châ hnê mơhno túa mơđah tơbleăng, tê tơmeăm tung mâu tíu ki chêh 'măn tung troăng hyôh măng internet. Kố châ ngăn cho troăng prôk vâ kơdroh ki kơtăn hơngế pơla pêi chiâk deăng ƀă kơchơ mơdró, malối tung pơla mơngế ki rôe xúa rế hía rế ai hên tơdroăng ki vâ rah xo tung troăng hyôh măng.

Pôa Lê Xuân Cường, Kăn pơkuâ khu pơkuâ kuăn pơlê pêi chiâk deăng cheăm Ea Súp tối tiah kố, ki dâi lĕm dêi kế tơmeăm pêi lo ing chiâk deăng hiăng châ mơdêk, la tơdroăng ki châ achê ƀă kơchơ tê mơdró, mơđah tơbleăng ƀă mơjiâng inâi dêi kuăn pơlê pêi chiâk deăng xuân ối iâ. Xua mê, pơ'lêh kơxô̆ kal châ hnê mơhno nhên vâ kuăn pơlê chiâng xúa hlối tung tơrêm tơdroăng ing pêi pêt, tơbleăng troh tê kế tơmeăm.

"Kuăn pơlê pêi chiâk deăng dêi pin mơjiâng mâu tơmeăm rế hía rế châ mơdêk 'na ki dâi lĕm. Laga, tơdroăng ki djâ mâu tơmeăm kố châ achê ƀă kơchơ tê mơdró ối trâm hên pá puât. Nôkố, pêi pro tiô Pơkâ 57 dêi Khu xiâm kal kí 'na mơdêk rơdêi pơhlêh xúa kŏng ngê̆, pin tơbleăng mâu tơdroăng hnê mơhno "râng kŏng hnê tơdroăng cheăng" ăm kuăn pơlê pêi chiâk deăng chiâng ‘nâi klê pơhlêh xúa kŏng ngê̆ a tơrêm tơdroăng cheăng dêi tơmeăm ƀă ing tơdroăng pêi pêt, mơđah tơbleăng troh tơdroăng ki rôe xúa tung mâu trang măng pơlê pơla, djâ tơmeăm pêi lo ing chiâk deăng châ achê mâu kơchơ tê mơdró".

Khu pơkuâ kuăn pơlê pêi chiâk deăng kong pơlê Dak Lak tối ăm 'nâi, tung la ngiâ, rêm râ Khu kô pơtối tŏng kum hô̆i viên po rơdâ tíu tê tơmeăm tung kơchơ mơdró kơxô̆, tơdjêp kŏng ngê̆ uâ pơliê pro ƀă mơdêk ivá pêi cheăng, tê mơdró. Rơtế amê cho tŏng kum liăn ing Khu râng liăn Tŏng kum kuăn pơlê pêi chiâk deăng, hnê hriâm tơdroăng cheăng tơdah xo tơkêa ƀă hngêi rak liăn ƀă hnê hriâm ki rơkê plĕng, tơdroăng cheăng ăm kuăn pơlê pêi chiâk deăng, tê mơdró rơkê.

Jâ H Giang Niê, Kăn hnê ngăn Khu kuăn pơlê pêi chiâk deăng kong pơlê Dak Lak tối tiah kố, pơhlêh tuăn tơmiât pêi, tơrŭm pêi ƀă tơdroăng ki rơhêng vâ dêi kơchơ cho tơdroăng ki kal. Drêng kuăn pơlê pêi chiâk deăng 'nâi xúa kŏng ngê̆, hbrâ tơbleăng ƀă tăng tíu tê, ki kơnâ dêi tơmeăm kô ôh tá xê to a kơvâ pêi pêt mê ối châ mơdêk a kơvâ uâ mơdiê ƀă tê.

"Khu kô tơbleăng đi đo vâ kuăn pơlê pêi chiâk deăng châ achê ƀă tơdroăng pơ'lêh xúa kŏng ngê̆ măng internet, kơchơ mơdró ƀă mâu kŏng ngê̆ uâ pơliê pro. Klêi mê, kum tơmeăm pêi lo dêi kuăn pơlê chiâng tơmeăm ki hên rêm hơnăm, tơniăn ing rêm hơnăm. Ngin púi vâ kô mơjiâng mâu "kuăn pơlê pêi chiâk deăng chiâng xúa kŏng ngê̆ măng internet" ƀă "khu pêi cheăng tơrŭm xúa kŏng ngê̆ măng internet" vâ rơtế prôk tung tơdroăng pơ'lêh pêi cheăng chiâng xúa kŏng ngê̆ măng internet".