Hơnăm kố, Dak Lak ai lối 21.100 ngế chêh inâi tơ’noăng, tung mê ai lối 610 ngế hiăng hriâm hdrối mê hía nah. Kong pơlê Dak Lak pơtối xing xoăng 32 tíu tơ’noăng ki khât ƀă 886 to lâm tơ’noăng a 15 to tơring, pơlê kong krâm ƀă pơlê kong kơdrâm. Troh nôkố, Vi ƀan hnê ngăn kong pơlê Dak Lak hiăng mơjiâng Khu hnê mơhno tơ’noăng râ kong pơlê ƀă hnê mơhno mâu tơring mơjiâng khu hnê mơhno tơ’noăng râ tơring, pơlê kong krâm, pơlê kong kơdrâm; chêh pro klêi mâu tơdroăng ‘măn rak, séa ngăn, ‘mâi rơnêu inâi dêi mâu ngế tơ’noăng tro tiô hâi khế pơkâ; hbrâ rơnáu mâu tơdroăng kế tơmeăm, mâu ngế cheăng veăng tơkŭm po hneăng tơ’noăng ƀă hên ki ê.

Jâ H’Yim Kđoh – Kăn phŏ hnê ngăn Vi ƀan kong pơlê Dak Lak, Ngế xiâm Khu hnê mơhno tơ’noăng râ kong pơlê pơkâ thế, rêm râ, mâu kơvâ cheăng, kong pơlê kal mơdêk hnoăng cheăng tơrŭm, hbrâ rơnáu mơjiâng bro túa pơkâ tơ’noăng nhên, ai pơxúa, rak vế tơniăn hneăng tơ’noăng châ po tơniăn lĕm, tơƀrê, kơtăng, tro pơkâ. Tơmâng ngăn tâ nếo troh hnoăng cheăng tối tơbleăng tung um tơvi ‘na hneăng tơ’noăng.

“Tơbleăng tŭm, tơdrêng, tơdroăng kal tơdrăng mâu túa pơkâ tơbleăng tơdroăng kal ai tơdjâk troh hneăng tơ’noăng. Malối, athế tơtrŏng ƀă mâu hngêi trung kơpong hngế hngo, kơpong xơpá châ tâng mâu tơdroăng tối tơbleăng ki kal ai túa pơkâ tŏng kum vâ mâu vâi o ai tŭm tơdroăng vâ teăm hbrâ rơnáu hiâm mơno lĕm tro má môi ăm hneăng tơ’noăng”.

Hơnăm hriâm 2022-2023 a Dak Lak hiăng mơgêi. Kố xuân cho rôh mâu hok tro khô̆i lâm 9 rah xo troăng prôk ki pơtối ăm dêi tơná. Tơ’noăng mot hriâm lâm 10 a mâu hngêi trung ki phá ra phá dêi rơpó, nâp hồ sơ rah xo mot hriâm tiô troăng lơ rah xo tơdroăng ki hriâm cheăng cho tơdroăng ki rơhêng châ tơmâng ngăn khât.

Kơvâ ngăn hnê hriâm ƀă hnê mơjiâng tuăn ngoâ rơkê Dak Lak xuân dế mơ-eăm ăm hnoăng cheăng rah xo hok tro lâm 10 ƀă klâ xoăng hok tro klêi kơ’nâi hriâm râ má péa.

Hngêi trung râ má pái Chuyên Nguyễn Du, Pơlê kong kơdrâm Ƀuôn Ma Thuột cho môi tung mâu hngêi trung châ hên hok tro rah xo vâ chêh inâi tơ’noăng mot hriâm. Tiô pơkâ, hơnăm hriâm 2023 – 2024, hngêi trung kô rah xo 405 ngế hok tro lâm 10, tung mê ai 9 lâm chuyên ƀă 2 lâm ki ôh tá chuyên. Hâi khế tơdah hồ sơ sap ing lơ 25 troh 31/5.

Pôa Nguyễn Đăng Bồng – Ngế pơkuâ hngêi trung râ má pái chuyên Nguyễn Du, kong pơlê Dak Lak ăm ‘nâi:

“Hok tro athế tơkâ luâ péa rôh, rôh má 1 cho séa ngăn hồ sơ, mâu vâi o athế pêi pro châ 2 tơdroăng: 1 cho tơdroăng hriâm ƀă hạnh kiểm 4 hơnăm hriâm athế châ sap ing túa ki chía rơkê tơngi klêng ƀă má péa cho plah râ má péa dêi mâu vâi o athế sap ing túa ki chía rơkê tơngi klêng. Drêng vâi o ai tŭm péa tơdroăng kố mê vâi o kô mot tung rôh má 2 vâ tơ’noăng 4 môn: Toán, Ngữ Văn, Ngoại ngữ ƀă 1 môn chuyên”.

Xuân tiô pơkâ rah xo hok tro lâm 10 hơnăm 2023 – 2024 dêi kong pơlê Dak Lak, rơtế ƀă Hngêi trung râ má pái chuyên Nguyễn Du mê mâu hngêi trung râ má pái hdroâng kuăn ngo a tíu kâ koi ối pơtê N’Trang Lơng ƀă Hngêi trung hdroâng kuăn ngo Dam San xuân xúa túa tơ’noăng mot hriâm. Mâu hngêi trung râ má pái công lập ki ê xúa túa pơkâ rah xo mot hriâm. Ƀă mâu hngêi trung râ má pái, hngêi trung phôh thong ai hên râ hriâm tư thục, rah hok tro mot hriâm krê tiô tơdroăng pơkâ rah xo hok tro dêi Vi ƀan hnê ngăn kong pơlê.

Ƀă mâu vâi o klêi kơ’nâi hiăng hriâm râ má péa ôh tá ai tŭm tơdroăng ki vâ châ mot hriâm a mâu hngêi trung râ má pái mê xuân ai hên tơdroăng ki rah xo drêng mâu tíu xiâm hnê cheăng pêi a kong pơlê kô pêi pro châ tiô tơdroăng ki rơhêng vâ rế hriâm cheăng ƀă rế hriâm văn hóa.

Pôa Đỗ Tường Hiệp, Kăn phŏ pơkuâ Khu ngăn hnê hriâm ƀă hnê mơjiâng tuăn ngoâ rơkê Dak lak ăm ‘nâi: Kơxô̆ klâ xoăng hok tro klêi kơ’nâi hriâm klêi râ má péa a Dak Lak cho chía hên, châ 80% tung tâi tâng kơxô̆ ngế hok tro lâm 9.

“Ƀă mâu hok tro ki ôh tá ai tŭm tơdroăng ki vâ châ pơtối hriâm tung mâu hngêi trung râ má pái, mâu tíu xiâm hnê cheăng pêi, giáo dục thường xuyên mê pơkâ tơdroăng cheăng ăm mâu vâi o kô veăng hriâm a mâu hngêi hnê cheăng pêi, hngêi trung trung kâ̆p, kao đăng ƀă ai mâi troăng prôk ki ê.

Xua mê hnoăng cheăng mơhno tơdroăng cheăng tung mâu hngêi trung châ mơdêk rơdêi vâ hnê mơhno ăm mâu vâi o mot tung tơdroăng rêh ối ƀă hriâm tâp, ôh ti xê bu ai to hngêi trung râ má pái mê ƀă mâu tơdroăng ki ê mơni kô hriâm tâp tro tâ ƀă ai tơdroăng rêh ối tơniăn lĕm tung la ngiâ”.

Tung mâu hơnăm hdrối nah, mâu hngêi trung râ má pái ƀă Tíu xiâm hnê cheăng pêi – Giáo dục thường xuyên a Dak Lak tơrŭm krá tơniăn tung tơdroăng ki tơkŭm hnê ăm hok tro. Rêm hơnăm ai dâng 3 rơpâu ngế hriâm tơdroăng giáo dục thường xuyên, sap ing 30 rơpâu troh 35 rơpâu ngế hriâm châ tơmiât hriâm tơdroăng cheăng tơtro ƀă ivá, tơdroăng ki rơhêng vâ dêi tơná ƀă tơdroăng ki rơhêng vâ dêi tơdroăng ki kal xúa mâu ngế cheăng.

Túa hnê văn hóa tơrŭm ƀă hnê cheăng a mâu tíu xiâm hnê cheăng pêi – Giáo dục thường xuyên châ tơbleăng, veăng kum kơhnâ ăm hnoăng cheăng klâ xoăng hok tro klêi kơ’nâi hriâm râ má péa tiô Pơkâ “Hnê hriâm tơdroăng cheăng ƀă pơkâ troăng tơmiât klâ xoăng hok tro tung hnê hriâm phôh thong pơla hơnăm 2018 – 2025”.