VOV4.Xơ Đăng - Vâ hbrâ ăm hơnăm hriâm nếo 2022-2023, hên nôu pâ ƀă hok tro a kong pơlê Dak Lak dế pêi pro hên tơdroăng vâ tí tăng rôe hlá mơ-eá hriâm ăm mâu khu lâm 3, lâm 7, lâm 10. Hên nôu pâ tô tuăn kô ôh tá ai hlá mơ-eá hriâm, xua hơnăm kố, cho hơnăm ki apoăng hriâm tiô mâu kơxop hlá mơ-eá ki hriâm phôh thong ki nếo.

Hơnăm kố, pôa Đỗ Hùng Thuần, ối a bêng Tân An, pơlê kong kơdrâm Ƀuôn Ma Thuột ôh tá vâ lăm rôe hlá mơ-eá hriâm ăm dêi kuăn tơná, mê cho athế kơnôm mâu vâi ki ê rôe ăm. Pôa Thuần tối ăm ‘nâi: Hơnăm kố, tơdroăng hriâm kố pêi pro tiô tơdroăng ki hriâm nếo, hlá mơ-eá hriâm nếo nôkố ai 3 khu hlá mơ-eá hiăng châ mâu hngêi tê hlá mơ-eá ki dó inâi Cánh diều, Chân trời sáng tạo, Kết nối tri thức ƀă hngêi trung ki kuăn tơná hriâm tiô tơdroăng ki pâ thế rôe mâu kơxop hlá mơ-eá hên túa pơrá phá dêi pó. Tơdroăng kố pro pá puât khât ăm pôa drêng vâ lăm rôe:

“Ngăn tiô kơ tơdroăng ki khu kơxop hlá mơ-eá ga ai pơrá phá dêi pó, athế kơnôm mâu ngế ki tê hlá mơ-eá tăng rah ăm, nôu pâ ôh tá ‘nâi ki klâi, ‘nâi rah tuá hlá mơ-eá ki tiah lâi vâ bê tŭm ăm mâu vâi kuăn muăn, cháu chái hriâm”.

Ƀă mâu hok tro môi tiah o Phan Ngọc Hân, hok tro lâm 7A4, Hngêi trung râ má péa Nguyễn Tất Thành, tơring Čư̆ Mgar maluâ hiăng châ hngêi trung chêh tối inâi mâu túa hlá mơ-eá ki kal vâ rôe mê vâ kơ bê tŭm hlá mơ-eá hriâm, la muăn hiăng tơngah dêi nôu pâ kơto rơxế troh a hngêi tê hlá mơ-eá a pơlê kong kơdrâm Ƀuôn Ma Thuột:

“Á muăn lăm ing tơring Čư̆ Mgar, drêng troh a pơlê kong kơdrâm á ôh tá ‘nâi tăng rah mâu túa hlá mơ-eá ki tiah lâi, môi tiah khu kơxop hlá mơ-eá Chân trờisáng tạo, Kết nối trí thức, Cánh diều. La kơnôm ai tơdroăng tŏng kum dêi hngêi trung mê á muăn hiăng tăng rah rôe xêh hlá mơ-eá ki tơtro”.

Tiô tơdroăng Pơkâ 1360, hâi lơ 16/6/2022 dêi Vi ƀan pơkuâ hnê ngăn kong pơlê Dak Lak ‘na tơdroăng kĭ pơkâ inâi kơxop hlá mơ-eá lâm 3, lâm 7 ƀă lâm 10 ai xúa tung mâu hngêi trung phôh thong hơnăm hriâm 2022-2023 tung kong pơlê, ƀă khu lâm 3 ai 21 inâi kơxop hlá mơ-eá; lâm 7 ai 26 inâi hlá mơ-eá; krê lâm 10 ai 44 túa hlá mơ-eá dêi khu kơxop hlá mơ-reá Cánh diều, Chân trời sáng tạo ƀă Kết nối tri thức ƀă tâi tâng ai 138 túa hlá mơ-eá, tung mê ai tá hlá mơ-eá ki rah xo ƀă pơklât thế rôe vâ hriâm.

Pôa Trương Văn Bằng, Kăn pơkuâ ngăn hngêi tê mơdró hlá mơ-eá, tơmeăm hriâm hngêi trung kong pơlê Dak Lak ăm ‘nâi: Vâ tơniăn ăm tơdroăng tê rôe hlá mơ-eá hriâm ăm hơnăm hriâm nếo, maluâ ƀă mâu khu lâm ki xúa tung hngêi trung phôh thong 2018, Kŏng ti tê mơdró hlá mơ-eá, tơmeăm hriâm hngêi trung Dak Lak hiăng mơhnhôk tâi tâng mâu ngế; mơjiâng tơ’nôm kơbong tê; tơkŭm lâm hnê hriâm ăm mâu ngế cheăng vâ hnê tối ăm nôu pâ hok tro, mâu hok tro ƀă mâu tíu ki tăng rah vâ rôe ăm ga tơtro.

“Mâu hngêi trung a tơring, pơlê kong kơdrâm, pơlê kong krâm, mâu hngêi trung rah xo hlá mơ-eá pơrá phá dêi pó, thăm nếo ôh tá bố bối dêi pó, xua mê, Kŏng ti xuân trâm hên xahpá, laga, Kŏng ti hiăng tơkêa ƀă Hngêi ki chêh in hlá mơ-eá hnê hriâm Việt Nam cho Kŏng ti ki vâ tê mơ’no bê tŭm mâu kơxop hlá mơ-eá, hlá mơ-eá hriâm ăm mâu vâi o hok tro a kong pơlê Dak Lak, la ôh tá păng lôi mâu hlá mơ-eá hriâm ki xiâm, hmâ tơring, cheăm ki lâi xuân athế tăng rah xêh vâ ga ai tŭm mâu kơxop hlá mơ-eá ki tro vâ hriâm tung hơnăm 2022-2023”.

Vâi nôu pâ tăng rah hlá mơ-eá hriâm ăm dêi kuăn ‘nĕng

Tơdroăng ki tăng rah xo xêh hlá mơ-eá hriâm hdrối vâ mot hơnăm hriâm nếo cho tơdroăng ki tô tuăn dêi mâu nôu pâ, mâu hok tro. Xua ti mê, vâ kum ăm tơdroăng rôe hlá mơ-eá hriâm ăm mâu vâi muăn tro tiô tơdroăng pơkâ, mê Khu ngăn ‘na hnê hriâm ƀă hnê mơjiâng tuăn ngôa rơkê Dak Lak hiăng ai hlá mơ-eá pơtroh mâu hngêi trung kal athế tăng rah mâu kơxop hlá mơ-eá hriâm ki tơtro vâ mot tung hơnăm hriâm nếo. Tơdrêng amê, mơhnhôk mâu nôu pâ, hok tro ‘na tơdroăng ki khuô̆t hlá mơ-eá hriâm tung apoăng ƀă tơdế khế 8, vâ ga mâ tá lôi ai hên ngế tăng rôe tơdrêng tung pơla kố. Tơdrêng mê, kal athế tăng rah rôe mâu túa hlá mơ-eá ing mâu hngêi mơdró hlá mơ-eá ki kân, ki xiâm, châ hên ngế loi tơngah, vâ pôi tá tro rôe mâu túa hlá mơ-eá ki ôh tá dâi, ôh tá tro tiô tơdroăng ki hnê hriâm.

Khu ngăn ‘na hnê hriâm ƀă hnê mơjiâng tuăn ngôa rơkê Dak Lak hiăng pơtroh hlá mơ-eá hnê tối tăng rah rôe hlá mơ-eá hriâm lâm 3, lâm 7, ƀă lâm 10 ăm hơnăm hriâm 2022-2023 tiô kơ tơdroăng ki hơ’lêh nếo dêi khu hlá mơ-eá hriâm phôh thong, xua Khu xiâm ngăn ‘na hnê hriâm ƀă hnê mơjiâng tuăn ngôa rơkê hiăng pơkâ.

Tiah mê, Khu ngăn ‘na hnê hriâm ƀă hnê mơjiâng tuăn ngôa rơkê Dak Lak hiăng pơkâ thế mâu khu râ, hngêi trung tung lâp kong pơlê pôu râng hnoăng cheăng vâ tăng rah hlá mơ-eá hriâm ki tro tiô tơdroăng hnê tối dêi Khu xiâm ngăn ‘na hnê hriâm ƀă Vi ƀan hnê ngăn kong pơlê; Khu kố ối hnê tối, mơhnhôk khĕn, chêh tối tung hlá mơ-eá hnê mơhno, pro mơnhên ‘na mâu tơdroăng ki hơ’lêh nếo ‘na túa hriâm phôh thong ƀă tơdroăng tăng rah hlá mơ-eá ăm tâi tâng mâu kăn ƀô̆, thái cô, mơngế cheăng, hok tro ƀă mâu nôu pâ hok tro.

Hdrối mê, vâ tŏng kum ăm mâu khu thái cô châ pơkuâ ngăn, mâu nôu pâ hok tro châ tí tăng hlê plĕng, hriăn ngăn ƀă rơkê plĕng khât mâu túa kơxop hlá mơ-eá hriâm ki nếo xua Hngêi chêh in hlá mơ-eá, Khu ngăn ‘na hnê hriâm ƀă hnê mơjiâng tuăn ngôa rơkê Dak Lak hiăng tơrŭm pơkâ pêi pro 2 hdroh vâ tơbleăng tối ‘na khu kơxop hlá mơ-eá hriâm lâm 3, lâm 7 ƀă lâm 10 tiô kơ tơdroăng mơ’no tơdrêng tung um tơvi pơla Khu ngăn ‘na hnê hriâm ƀă hnê mơjiâng tuăn ngôa rơkê ƀă mâu Hngêi chêh in hlá mơ-eá ƀă mâu hngêi trung tung kong pơlê.

Hương Lý chêh

Nhat Lisa tơplôu ƀă tơbleăng