VOV4.Xơ Đăng - Tá hâi châ môi khế xếo, hok tro rêm râ a kong pơlê Dak Lak kô mot hơnăm hriâm nếo 2022-2023. Vâ tơniăn ăm hnoăng cheăng hnê ƀă hriâm, tơdroăng ki hbrâ rơnáu mâu kế tơmeăm dế châ mâu tơring, cheăm pêi pro kơhnâ khât, pơkâ mâu tơdroăng tơkêa pêi, kring vế tơniăn tơdroăng hnê hriâm a tơrêm tơdroăng cheăng.

Mâu hâi apoăng khế 8, a Hngêi trung râ má môi Čư̆ Pui II, hngêi trung ki pro a Ea Rớt, cheăm kơpong hngế hngo Čư̆ Pui, tơring Krông Bông hngêi pro 2 râ 6 to lâm hriâm ƀă mâu kơbong tơdjâk ki kê, dế châ pro hiăng vâ klêi a kuâ. Mâu lâm hriâm ki ton ƀă kơbong ki ê dế châ sơng hiăng vâ klêi; tung mâu lâm hriâm, kơƀăng tăng, kế ki chêh hnê ƀă mâu kế tơmeăm xúa tung hnê hriâm xuân châ hbrâ rơnáu tâi tâng.

Thái hnê chư inâi Nguyễn Hồng Thuần – Ngế ki pơkuâ hngêi trung ăm ‘nâi, hơnăm hriâm kố, 3 to hngêi trung dêi Hngêi trung râ má môi Čư̆ Pui II kô tơdah dâng 1.400 ngế hok tro. Nôkố péa to hngêi trung a chê tíu xiâm Vi ƀan hnê ngăn cheăm hiăng châ hbrâ rơnáu klêi mâu kế tơmeăm, bu ối to hngêi trung a Ea Rớt xuân dế tung pơla hbrâ rơnáu tơmeăm, athế troh mơ’nui khế 12 ah nếo klêi.

Vâ rak tơniăn hnoăng cheăng hnê hriâm drêng kế tơmeăm cho kơƀăng drêng tá hâi klêi, hngêi trung hiăng hbrâ rơnáu túa pơkâ ki hbrâ rơnáu.

“Nôkố pro 6 to lâm hriâm la tá hâi klêi, athế troh apoăng hneăng hriâm má 2 nếo klêi, ƀă kô lăm hơ’lêh hriâm. Ki hdrối tâ, hngêi trung ai môi to kơbong ki pơtâp ivá pro ƀă loăng ƀă kô xúa kơbong ki kố pro lâm hriâm pơtân. Hngêi trung xuân hiăng xing xoăng pơtroh kơƀăng, tăng ăm lâm hriâm pơtân kố; pakĭng mê, xuân hiăng pro hlá mơ-éa pơtroh ăm Vi ƀan hnê ngăn tơring pâ liăn roê tơ’nôm 30 to kơƀăng tăng ki nếo ƀă hiăng châ kĭ pơkâ hbru ƀă drêng roê kô pơtroh tâi troh akố”.

Hơnăm hriâm 2022- 2023 tơring Krông Bông ai 51 toăng hngêi trung sap ing mầm non troh râ má péa, ƀă 21 rơngế hok tro. Pôa Huỳnh Viết Trung, ngế ki ai hnoăng thế pơkuâ Ƀơrô cheăng hnê hriâm ƀă hnê mơjiâng tuăn ngoâ rơkê tơring ăm ‘nâi, vâ hbrâ rơnáu ăm hơnăm hriâm nếo, Vi ƀan hnê ngăn tơring Krông Bông hbru ăm vâ chê 24,5 rơtal liăn pro nếo 66 to lâm hriâm; xing xoăng hên kơxô̆ liăn ki ê nếo vâ ‘mâi rơnêu lối hrĭng to lâm hriâm ki ton; roê mâu kế tơmeăm xúa, kơƀăng tăng, kơmăi kơmok xúa tung hnê ƀă hriâm.

Troh nôkố, ki hên mâu hngêi trung pơrá pêi pro tro tơdroăng ki pơkâ mơ’no.

“ ’Na tơdroăng ki hbrâ rơnáu mâu kơƀăng tăng vâ hbrâ ăm hơnăm hriâm nếo 2022 – 2023 mê Ƀơrô ngăn hnê hnê hriâm ƀă hnê mơjiâng tuăn ngoâ rơkê tơring hiăng hbrâ rơnáu hnoăng cheăng riân ngăn sap ing hơnăm hdrối, mơjiâng pro túa pơkâ sap ing hngế, klêi mê pơtroh ăm Vi ƀan hnê ngăn tơring kĭ, malối cho mâu cheăm ki hngế hngo tung kơpong.

Nôkố, ai mâu hngêi trung hiăng pro klêi, ối ai mâu hngêi trung dế ối pro la xuân hiăng vâ klêi vâ pro tiah lâi troh khế 9 hơnăm kố kô klêi tâi tâng, hbrâ rơnáu ăm pơxiâm mot hơnăm hriâm nếo”.

Apoăng khế 8/2022, hên hok tro a Hngêi trung râ má môi Čư̆ Pui II, hngêi trung ki pro a Ea Rớt, cheăm Čư̆ Pui, tơring Krông Bông troh hngêi trung kơpuih văng plông hngêi trung, hbrâ ăm hơnăm nếo

Ƀă a tơring Lak, hơnăm hriâm 2022 – 2023 kố, xuân tơdah vâ chê 13 rơpâu ngế hok tro hriâm sap ing râ mầm non troh râ má péa. Pôa Nguyễn Văn Ngọc – Ngế ki pơkuâ Ƀơrô cheăng hnê hriâm ƀă hnê mơhno tơring tối, tơdroăng ki roê mâu kế tơmeăm xúa tung hriâm tâp, ‘no liăn roê mâu kơƀăng, tăng châ ƀơrô tơbleăng túa pơkâ troh mâu hngêi trung sap ing apoăng.

Drêng mot tung rơnó pơtê, Ƀơrô cheăng pơkâ thế mâu hngêi trung hbrâ rơnáu xêh, ngăn a kơxô̆ liăn tơná hrê châ hbru vâ pêi pro mâu tơdroăng ki rơnêu, roê kế tơmeăm; kơhnâ séa ngăn mâu kế tơmeăm ki dế mơjiâng pro nếo vâ rak vế tơniăn tro tơdroăng; pơkâ túa hbrâ rơnáu vâ tơniăn tâng ai mâu hngêi trung ôh tá teăm klêi mê tơdroăng ki hriâm xuân ôh tá chiâng tơƀrê:

“Ƀơrô ngăn hnê hriâm ƀă hnê mơjiâng tuăn ngôa rơkê châ pro ngế ki ‘no liăn ‘mâi rơnêu 3 to hngêi tung hriâm, ƀă 1 tung mâu hngêi trung ki mê hiăng klêi, ối 2 to hngêi trung nếo dế hiăng vâ klêi ƀă troh lơ 15/8 kố xuân kô klêi tơdroăng ki ‘mâi rơnêu. Nôkố ối mâu kế tơmeăm ki kân tơdroăng ki pêi pro klêi mơni kô hrá  tâ klêi kơ’nâi khế 9, ƀă tơdroăng kố hbrâ rơnáu tơrŭm ƀă mâu hngêi trung mơjiâng túa pơkâ ki hdrối tâ cho ăm hok tro akố ai mâu kơbong hriâm ki ton lơ klâ hriâm péa xôh. Ki xiâm cho vâ rak tơniăn tro hnoăng cheăng hnê ƀă hriâm”.

Tiô Khu ngăn hnê hriâm ƀă Hnê mơjiâng tuăn ngoâ rơkê, hơnăm hriâm 2022 – 2023, lâp kong pơlê ai 478.180 ngế hok tro hriâm a 1.017 toăng hngêi trung, ing râ mầm non troh râ má pái phôh thong. Vâ rak tơniăn tŭm mâu kơƀăng, tăng ăm hơnăm hriâm nếo, Vi ƀan hnê ngăn kong pơlê hiăng ‘no vâ chê 477 rơtal liăn vâ pro ƀă roê kơƀăng, tăng kế tơmeăm xúa tung hnê hriâm. Tung mê, vâ chê 389 rơtal liăn pro nếo 350 to lâm hriâm, ‘mâi rơnêu hên hngêi trung hriâm; dâng 88 rơtal liăn roê mâu kơƀăng, tăng, bảng chêh ƀă hên kế tơmeăm xúa tung hnê ƀă hriâm kiê.

Tuấn Long chêh

Katarina Nga tơplôu ƀă tơbleăng