Ko ƀai vâ tơ’noăng mơgêi râ má 3 phôh thong hơnăm 2023 châ tơƀrê khât, kơvâ Hnê hriâm ƀă hnê mơjiâng tuăn ngôa rơkê dêi kong pơlê Dak Lak dế pêi pro kơhnâ tung hnoăng cheăng vâ hbrâ ăm hneăng tơ’noăng. Tung mê, ki xiâm cho ‘mâi mơnhông ki rơkê plĕng, séa mơnhên ngăn ivá hriâm rơkê dêi hok tro vâ xing xoăng ăm hok tro hriâm tâp tro tiô kơ ivá tơná.

Tiô pơkâ dêi Khu xiâm ngăn ‘na hnê hriâm ƀă hnê mơjiâng tuăn ngôa rơkê, Hneăng tơ’noăng mơgêi râ má 3 phôh thong hơnăm 2023 po tung 2 hâi, cho hâi lơ 28 ƀă lơ 29 khế 6. Hơnăm kố, kong pơlê Dak Lak hiăng ai lối 20 rơpâu ngế hok tro tơkŭm tơ’noăng a 32 tíu hngêi trung a 15 tơring, pơlê kong krâm, pơlê klong kơdrâm dêi kong pơlê.

Pôa Phạm Đăng Khoa, Kăn ngăn ‘na hnê hriâm ƀă hnê mơjiâng tuăn ngôa rơkê tối ăm nâi: Hneăng tơ’noăng hơnăm kố, Khu xiâm ngăn ‘na hnê hriâm ƀă hnê mơjiâng tuăn ngôa rơkê dế pơtối pơcháu ăm mâu kong pơlê, pơlê kong kân pôu râng dêi hnoăng ngăn tơ’noăng. Xua mê, Khu ngăn ‘na hnê hriâm ƀă hnê mơjiâng tuăn ngôa rơkê dêi kong pơlê Dak Lak hiăng pơkâ pêi pro dêi xêh hnoăng cheăng ing mâu khế hdrối nah. Troh nôkố, hnoăng cheăng ăm hneăng tơ’noăng mơgêi râ má pái phôh thong hơnăm 2023 châ pêi pro tro tiô tơdroăng pơkâ.