VOV4.Xơ Đăng - Bú ối pá to lâi hâi ‘nôi, vâ chê 480 rơpâu ngế hok tro rêm râ a kong pơlê Dak Lak kô mot tung hơnăm hriâm nếo 2022-2023. Tung pơla kong pơlê Dak Lak dế ối kal pá 1 rơpâu 260 ngế thái cô, mê kơvâ ngăn ‘na hnê hriâm dêi kong pơlê hiăng ƀă hbrâ rơnáu mơjiâng mâu troăng hơlâ ki vâ kring vế rak ngăn hnoăng cheăng hnê mơhno tung hơnăm hriâm nếo kố.

Hơnăm hriâm 2022 – 2023 kố, Hngêi trung râ má môi Chư̆ Pui II, cheăm kơpong hơngế hơngo Čư Pui, tơring Krông Bông ai 1.400 ngế hok tro tiô hriâm mâu lâm sap ing lâm 1 troh lâm 5. Thái Nguyễn Hồng Thuần – Thái pơkuâ hngêi trung tối, nôkố hngêi trung tá hâi tŭm tâi tâng 8 thái cô:

‘’Hngêi trung ai 37 lâm, tiô riân môn nâl kong têa Ăng-glê hriâm 4 tiêt mê ôh tá tŭm ki vâ iâ má môi 2 ngế thái cô, ƀă môn tin hok xuân ôh tá tŭm 2 ngế thái cô. Pơla kố nah, hngêi trung hiăng pâ thế Ƀơrô Hnê hriâm – hnê mơjiâng tuăn ngôa rơkê tơring ƀă hiăng hôp ƀă môi tuăn troăng pâ Ƀơrô pơkuâ kăn ƀô̆, Vi ƀan tơring rêm môn 1 ƀiên chê̆ cho môn nâl kong têa Ăng-glê ƀă tin hok, tá hâi tŭm 2 ngế nếo mê hngêi trung kô kĭ tơkêa hnê tiô khế ƀă drêng lâi ai ƀiên chê̆ mê kô hôp hô̆i đong tơbleăng ăm pêi pro”.

Kong pơlê Dak Lak nôkố tá hâi tŭm 670 ngế thái cô mầm non

Tơring Krông Bông nôkố ai 51 hngêi trung hriâm ing râ mâm non troh râ má péa, ƀă 21 rơpâu ngế hok tro tiô hriâm. Pôa Huỳnh Viết Trung – Pôu râng hnoăng Kăn pơkuâ Ƀơrô hnê hriâm – Hnê mơjiâng tuăn ngôa rơkê tơring tối ăm ‘nâi, kơvâ hnê hriâm tơring nôkố ôh tá tŭm 133 ngế thái cô, tung mê, ki hên cho cô hnê mâm non ƀă 80 ngế, ki ê cho 53 ngế thái cô hnê râ má môi. Mơhé dế ôh tá tŭm thái cô, laga ƀơrô hiăng ƀă dế hbrâ mơjiâng mâu troăng vâ tơniăn tơdroăng hnê hriâm ăm hơnăm hriâm nếo.

Pôa Huỳnh Viết Trung tối troăng vâ pêi pro:

‘’Ƀă râ mâm non, ngin kô kơdroh kơxô̆ lâm vâ mơhnhôk kơxô̆ hok tro to a lâm hriâm kơdrâm hên tâ. Ƀă râ hriâm râ má môi, ngin xuân tơniăn 100% mâu hngêi trung xuân hnê tin hok, nâl kong têa Ăng-glê tiô tơdroăng ki nếo. Vâ pêi pro tơdroăng kố, ƀơrô kô tơkŭm po pơ’lêh tung pêi cheăng; má péa nếo kô tơkŭm ƀiên chê̆ vâ xúa kơxô̆ ki rơlối; ƀă troăng má mơ’nui cho mâu hngêi trung ki kŭn mê thái cô hnê tin hok, nâl kong têa Ăng-glê thế pêi pro tơdroăng hnê hriâm tung hngêi trung vâ tơniăn ăm hơnăm hriâm nếo’’.

Lâp kong pơlê Dak Lak tá hâi tŭm 1.260 ngế thái cô râ mầm non troh râ má pái

Ƀă a tơring Krông Ƀúk, hơnăm 2022 – 2023 kố xuân tơdah dâng 14.000 ngế hok tro, tiô hriâm mâu râ ing Mâm non troh râ má péa a 46 hngêi trung hriâm. Môi tiah tơring Krông Bông, kơvâ hnê hriâm tơring Krông Ƀúk xuân dế kal 110 ngế thái cô. Laga ôh tá môi tiah Krông Bông, kơxô̆ thái cô ôh tá tŭm a Krông Ƀúk tŭm a 3 râ sap ing râ mâm non troh râ má péa. Tung mê, Mâm non ôh tá tŭm hên má môi ƀă 58 ngế thái cô, râ má môi cho 38 ngế, ki ê 18 ngế thái cô râ má péa.

Pôa Nguyễn Đình Khả - Kăn pơkuâ Ƀơrô hnê hriâm – Hnê mơjiâng tơring tối ‘na pơkâ pêi hnê hriâm dêi kơvâ hnê hriâm Krông Ƀúk hơnăm hriâm nếo 2022 – 2023, tung pơla tơring dế ôh tá tŭm hên ‘nâng thái cô hnê hriâm:

‘’Ƀơrô Hnê hriâm tơbleăng ăm Vi ƀan tơring cho tơdroăng rah xo hok tro tá hâi xing xoăng tŭm tiô kơxô̆ dêi thái cô. Pơtih ƀă râ Mầm non pơkâ cho 2,2, ƀă tơdroăng kal vâ cho 2,0 thái cô  pơkuâ lâm, mê ngin ăm chu 1,5 troh 1,6 thái cô pơkuâ lâm tê vâ tơxâng tơdroăng hnê hok tro to a lâm hriâm. Râ má môi cho 1,5, mê á xing xoăng dâng 1,3 lơ 1,2 tê. Râ má péa mê tá hâi tŭm 18 ngế, môn ki ôh tá tŭm ngế hnê môn ki ‘na rơlối ngế hnê, ki kố thế vêh xing xoăng tơdroăng mơngế hnê’’.

Hơnăm hriâm nếo kố kong pơlê Dak Lak ai 478.180 ngế hok tro hriâm a 1.071 hngêi trung sap ing râ Mầm non troh râ má pái ƀă Tíu hnê đi đo, Tíu hnê cheăng pêi. Nôkố Dak Lak dế ôh tá tŭm 1.260 ngế thái cô. Pôa Phạm Đăng Khoa – Kăn pơkuâ Hnê hriâm ƀă Hnê mơjiâng Dak Lak tối ăm ‘nâi:

‘’Ƀă Dak Lak mê dế tơkôm pơcháu pơkâ tơ’nôm dêi Chin phuh ‘na. Kơvâ hnê hriâm hiăng tơbleăng ăm Vi ƀan kong pơlê xing xoăng kơxô̆ châ pơcháu tơ’nôm mê ăm mâu tơring ki tá hâi tŭm pơtih, môi tiah: Lăk, Krông Bông, Krông Ƀúk, kố cho mâu tơring kơtiê. Tơdroăng tơ’nôm kô kơjo râ hriâm mâm non. Mâu tơring ai tơdroăng cheăng kâ hôm tâ mê tơkŭm krếo thế mâu troăng pơ’lêh tŭm tơdroăng ƀă hía hé’’.

Ƀă tơdroăng hbrâ xing xoăng tíu pêi cheăng, rah tơtro khu thái cô hnê a mâu hngêi trung, tíu hnê hriâm xuân môi tiah mâu troăng pêi ki ê tung pơla ôh tá tŭm lối 1.200 pơkâ châ ƀiên chê̆ hnê hriâm, kơvâ hnê hriâm Dak Lak hiăng hbrâ koh tơdah hok tro tơkŭm hngêi trung hriâm tung hơnăm hriâm nếo.

Tuấn Long rah chêh

A Sa Ly tơplôu ƀă tơbleăng