Ôh tá châ 1 măng tĭng xếo kô troh hneăng tơ’noăng mơgêi hriâm râ má pái hơnăm 2023 kô po. Mâu hngêi trung râ má pái a kong pơlê Dak Lak hiăng pê klêi mâu tơdroăng cheăng má mơ’nui, vâ tơniăn hneăng tơ’noăng tá ai tơdroăng klâi hlối tơƀrê. Hneăng tơ’noăng mơgêi hriâm râ má pái phôh thong hơnăm kố, kong pơlê Dak Lak ai 33 tíu tơ’noăng ƀă lối 21 rơpâu 100 ngế tơ’noăng, ai vâ chê 3.000 ngế kăn ƀô̆, thái cô, séa ngăn ƀă a mâu tíu tơ’noăng.

Pôa Phạm Đăng Khoa, Ngế pơkuâ ngăn hnê hriâm ƀă hnê mơjiâng tuăn ngôa rơkê kong pơlê Dak Lak ăm ‘nâi; Khu xiâm hiăng mơjiâng mâu kăn lăm séa  ngăn hdrối hneăng tơ’noăng ‘na mâu tơdroăng rak tơniăn ăm hneăng tơ’noăng, hriâm vâ hlê ăm mâu kăn ƀô̆ ngăn tơ’noăng; mơdêk tơdroăng hnê tối mâu tơdroăng teăm tơdrêng, tŭm tá mâu tơdroăng ki nếo tung hneăng tơ’noăng troh mâu thái cô ƀă hok tro. Tơrŭm krá ƀă mâu kơvâ cheăng hbrâ mơjiâng mâu troăng rơhlâ kring tơniăn, ăm hnoăng tơ’noăng klêi ai tơdroăng ôh tá tơniăn a tơring Cư Kuin kố nah.