Hâi lơ 25/4, Khu kăn ki pêi dêi hnoăng cheăng Ƀơrô Chin phuh hiăng ai rôh pêi cheăng ƀă Vi ƀan hnê ngăn kong pơlê Dak Lak vâ séa ngăn, hnê mơhno tŏng kum tơbleăng mâu tơdroăng ki kal ai tơdjâk troh hơ’lêh nếo pơkâ tơleăng mâu hlá mơ-éa a kong pơlê.

Tiô tối tơbleăng dêi Vi ƀan hnê ngăn kong pơlê Dak Lak, riân tâi khế 3, kơxô̆ mâu hlá mơ-éa châ tơbleăng hơ’lêh tro a kong pơlê ai 1.572 hlá mơéa. Cổng dịch vụ công dêi kong pơlê hiăng tơdjêp ƀă Cổng Dịch vụ Tơnêi têa. Kong pơlê hiăng tơbleăng po rơdâ tơdroăng ki tơdah, pơkâ tơleăng hồ sơ tiô troăng ôh tá tơkôm tung tíu ki chêh bro a tơring cheăm xúa kong ngê̆ thong tin tung pêi pro troăng hơlâ môi tíu, cho môi tíu tơdjêp hên kơvâ.

Kơxô̆ hồ sơ mơ-éa chêh bro xua kơ koan, khu ki rơkê ‘na tơdroăng cheăng râ kong pơlê tơdah xo tung hơnăm 2022 châ pơkâ tơleăng tro hâi khế cho lối 89%, râ tơring ai 98,7%, râ cheăm cho 99,9%.Tơpui a rôh pêi cheăng, pôa Nguyễn Duy Hoàng – Kăn phŏ Khu séa ngăn chêh pro hlá mơ-éa pơkâ thế: Kong pơlê Dak Lak kal pêi pro séa ngăn, hơ’lêh nếo túa pơkâ, túa ki tơkŭm tơdroăng cheăng a Tíu xiâm Kum chêh pro hlá mơéa tơdjuôm kong pơlê ƀă mâu khu ki chêh pro Môi tíu rêm râ vâ tơtro ƀă tơbleăng ăm túa pơkâ hơ’lêh kơxô̆ tơtro ƀă tơdroăng ki tơdah xo ƀă mơdrếo mâu hlá mơ-éa hồ sơ drêng hiăng pro klêi.