VOV4.Xơ Đăng - Tung 2 hâi (lơ 13 troh 14/10), Đoân Droh rơtăm Kŏng san Hồ Chí Minh kong pơlê Dak Lak tơkŭm po hneăng hôp mâu kăn rôh má 12, hneăng hơnăm 2022-2027 ƀă tơdroăng veăng dêi 300 ngế kăn, teăng mâ ăm lối 90 rơpâu ngế đoân viên, droh rơtăm tung lâp kong pơlê.  Ƀă tơdroăng pơxá “Djâ troăng ahdrối - Túa ki lĕm - Tơrŭm môi tuăn - Hriăn plĕng ki nếo - Mơnhông mơdêk”. Mê tung hneăng ki nếo, hơnăm kố nếo Dak Lak tơkŭm pêi klêi mâu tơdroăng pơkâ môi tiah tŏng kum 5 thôn, pơlê ki xơpá pêi klêi tơdroăng pơkâ mơjiâng thôn pơlê nếo; pêt ƀă rak ngăn 1,5 rơtuh xiâm loăng ngiât; hnê tơ’nôm mơdêk ivá cheăng tơpui kâ ƀă tơrŭm lâp plâi tơnêi ăm kăn ƀô̆ Đoân ƀă đoân viên droh rơtăm.

Khu kăn Đoân Droh rơtăm Kŏng san Hồ Chí Minh kong pơlê Dak Lak hneăng 12, hneăng hơnăm 2022 - 2027 tơbleăng a hneăng hôp

Vâ pêi klêi mâu tơdroăng pơkâ mê, nâ H’Giang Niê, Kăn hnê ngăn Đoân Droh rơtăm Kŏng san Hồ Chí Minh kong pơlê Dak Lak hneăng 12, hneăng hơnăm 2022-2027 ăm ‘nâi, khu tơrŭm cheăng Đoân kô tơmâng troh tơdroăng mâu ngế đoân viên droh rơtăm kơpong hơngế hơngo, kơpong hdroâng kuăn ngo, pơtối mơdêk ki tơƀrê cheăng tung đoân viên droh rơtăm ing râ cheăm, vâ tơdroăng pêi pro dêi Đoân châ tơƀrê rế ton rế châ mơnhông mơdêk.

VOV Tây Nguyên/Tơplôu: Gương