VOV4.Xơ Đăng - Hâi lơ 18/10, Vi ƀan hnê ngăn kong pơlê Dak Lak tơrŭm ƀă Ƀơrô Tê mơdró ƀă Công nghiệp Việt Nam (VCCI) tơkŭm po Rôh hôp hơ’lêh tơdroăng ki ‘no liăn pêi cheăng ƀă tê mơdró mơdêk khu mơdró kâ a kong pơlê mơnhông. A Rôh hôp, mâu kăn hiăng tăng ‘nâi ‘na Khu kơlo kơxô̆ mơnhên tối ivá pơkuâ khu râ cheăm tơring, khu râ kơvâ cheăng ƀă kong pơlê. Tơdrêng a mê hlối tơpui tơno ‘na mâu tơdroăng ki tơ’lêi hlâu, pơloăng mơnúa ƀă kong pơlê Dak Lak tung tơdroăng ki hơ’lêh tung tê mơdró.

Tâ tá rôh hôp

Tiô mâu kăn tối, mâu hơnăm hdrối mê hía nah Dak Lak hiăng ai hên tơdroăng hơ’lêh tung tơdroăng ki pro tơ’lêi hlâu ăm mâu khu mơdró kâ châ xúa mâu troăng hơlâ tŏng kum ‘na tơnêi tơníu; Ai hvêa chêng prôk nhên tung tơdroăng kơdroh kơxô̆ liăn ki ôh tá khât: Bro chiâng tơdroăng ki tơdâng tơ’mô tung tơdroăng ki tê mơdró; Troăng hơlâ tŏng kum khu mơdró kâ hlo tơ’lêi hlâu.

Laga, mâu kăn xuân tối tiah kố, mơ-eăm hơ’lêh cheăng a mâu cheăm, tơring tá hâi nhên, ối ai tơdroăng ki pêi pro tơdroăng ki mơhno tê, tá hâi séa ngăn kơtăng ƀă tơdroăng pêi pro ki khât dêi khu mơdró kâ; Hên hlá mơ-éa bro ối mơnhêa mơnheăn, tơvâ tơvân.

VOV Tây Nguyên/Tơplôu: Katarina Nga