VOV4.Xơ Đăng - Kơxê lơ 6/10, Vi ƀan kong pơlê Dak Lak tơkŭm po hôp ƀă mâu kơvâ cheăng, tíu cheăng ƀă kong pơlê ki tơdjâk vâ thăm pêi pro rĕng pêi pro tơdroăng tơkêa bro Troăng kân ăm phêp rơxế kơtâu têi  Ƀuôn Ma Thuột – Khánh Hòa. Troăng kân xŏn 117,5 km, tâi tâng kơlo liăn mơ’no cheăng vâ chê 22.000 rơtal liăn.

Tung mê, kơpong tơkâ kơpong Dak Lak xŏn dâng 85 km, kal xĕn ăm lối 300 rơpŏng kuăn pơlê. A roh hôp, khu râ kăn pơkuâ Vi ƀan kong pơlê Dak Lak hiăng xing xoăng nhên ăm mâu khu cheăng, kơvâ cheăng, tíu cheăng ki tơdjâk ƀă 3 tơring ai troăng kân ăm phêp rơxế kơtâu têi prôk hluâ, pêi pro tơdroăng cheăng tiô hnoăng cheăng tung mâu kơvâ cheăng tăng tơnêi, xĕn kuăn pơlê rêh ối tơniăn, loăng pơlái kong kế, rah xo khu ki mơjiâng pro, pơ’lêh pêt kong, xĕn hngêi trăng, troăng kơxái on tơhrik.

Dak Lak hôp thăm pêi pro rĕng troăng kân ăm phêp rơxế kơtâu têi Ƀuôn Ma Thuột – Khánh Hòa

Pơkâ xiâm ahdrối cho pro kêi tơbleăng tơdjâk kong prâi hdrối hâi lơ 12 khế 11 la ngiâ, mê cho tơniăn pơxiâm mơjiâng pro hdrối lơ 30 khế 6 hơnăm 2023, pơkâ kô klêi đeăng troăng kân a hơnăm 2026 ƀă ăm xúa tơdâng tung hơnăm 2027.

VOV Tây Nguyên/Tơplôu: A Sa Ly