VOV4.Xơ Đăng -  “Dak Lak kal kơtăng tâ nếo tung tơdroăng ki hbrâ ví klâk têa a vâi hdrêng”, kố cho tơdroăng pơkâ thế dêi Khu kăn ki pêi dêi hnoăng cheăng dêi Vi ƀan Mơhno túa lĕm tro – Hnê hriâm Kuô̆k hô̆i hneăng 15 drêng pêi cheăng ƀă Vi ƀan hnê ngăn kong pơlê Dak Lak ‘na tơdroăng ki pêi pro troăng hơlâ, luât hbrâ ví klâk têa vâi hdrêng a kong pơlê a kơxê lơ 11/8. Tiô tối tơbleăng dêi Vi ƀan hnê ngăn kong pơlê Dak Lak, tơdroăng ki klâk têa a vâi hdrêng a  kong pơlê xuân ai đi đo, kơxô̆ vâi hdrêng hlâ hơnăm kơ’nâi hên tâ hơnăm hdrối.

Pôa Tạ Văn Hạ, kăn phŏ pơkuâ Vi ƀan Mơhno túa lĕm tro – Pơlê pơla dêi Kuô̆k hô̆i tơpui a rôh pêi cheăng

Hơnăm 2016 troh nôkố ai lối 420 ngế hdrêng klâk têa, krê 6 khêa apoăng hơnăm 2022, hiăng ai 55 ngế hlâ, tơkŭm hên a mâu vâi o sap ing 6 – 13 hơnăm. Tơpui a rôh pêi cheăng, pôa Tạ Văn Hạ, kăn phŏ pơkuâ Vi ƀan Mơhno túa lĕm tro – Pơlê pơla dêi Kuô̆k hô̆i hiăng tối mâu tơdroăng ki xơpá ƀă ki tá hâi kơdroh ki kong pơlê Dak Lak dế trâm. Tơdrêng a mê hlối pơkâ thế rêm râ, mâu kơvâ cheăng tung kong pơlê kal mơdêk tâ nếo hnoăng cheăng hnê tối, hnê hriâm mơdêk ki hlê plĕng ăm tâi tâng kuăn pơlê ‘na hbrâ ví klâk têa a vâi hdrêng.

Katarina Nga tơplôu ƀă tơbleăng