Kong pơlê Dak Lak nôkố ai 1.069 ngế krâ pơlê, ngế ki kuăn pơlê loi tơngah. Tung pơla hdrối kố nah, khu kố kơhnâ veăng mơhnhôk kuăn pơlê mơnhông cheăng kâ, kơdroh kơtiê, mơjiâng thôn pơlê nếo; rak vế gâk kring tơniăn, tơleăng mơnhên mâu tơdroăng tơhôu tơhêng; rak vế mâu tơdroăng ki kơnâ khôi túa lĕm tro.

Hên ngế ối djâ troăng ahdrối tung pêi cheăng kâ, mơhnhôk kuăn pơlê hơ'lêh túa pêi cheăng kâ, pro môi tuăn drêng pêi pro mâu troăng hơlâ, luât pơkâ a pơlê cheăm. A hneăng hôp, mâu kăn teăng mâ tối hên túa ki rơkê tơtro, túa pêi ki nhên tung mơhnhôk kuăn pơlê mơ-eăm hluăn ing kơtiê, tơleăng tơdroăng tơhôu tơhêng, rak vế khôi túa, vêa vong, xĕn kuăn pơlê ƀă tơrŭm rak tơniăn pơlê pơla.

Khu tơkŭm po hiăng khĕn kơdeăn 220 ngế krâ pơlê, ngế pơkuâ thôn, ngế ki kuăn pơlê loi tơngah ƀă 11 khu pú hên ai hên hnoăng veăng 'no tung tăng cheăng pêi, tŏng kum tơdroăng rêh ối, kơdroh kơtiê ƀă mơnhông cheăng kâ - rêh ối pơlê pơla kơpong hdroâng kuăn ngo.