Hòa Thịnh - kơpong kong xiâm têa lân lu tro tơ’nhê, lŭp ó khât tung rôh têa  lân lu a khế 11 hơnăm nah, nôkố dế hbrâ  hbrâ ví xía vâ xua kong prâi pro ôh tá tơniăn. Pakĭng mâu toăng hngêi ki nếo ai râ ôh tá ăm têa châ lu, châ mơjiâng pro ing “Tơdroăng thâ pêi pro Quang Trung", 13 toăng hngêi hbrâ ví têa kân lân lu dêi kuăn pơlê dế châ mơjiâng pro. Tiô pôa Phương Văn Lành, Kăn pơkuâ hnê ngăn cheăng Đảng cheăm Hòa Thịnh, ƀă 13 toăng hngêi hbrâ ví têa kân lân lu, rêm toăng hngêi ai ivá kâi trâng dâng ăm 200 ngế ối, kong pơlê kô hmiân tuăn tung tơdroăng tăng tíu ối pơtân tơniăn ăm vâi krâ nhŏng o drêng têa kân lân lu. Hnoăng cheăng hbrâ  mơngế ƀă hnê hriâm kih thuât tŏng xo xuân châ pêi pro:

“Cheăm Hòa Thịnh dế tơmâng hên troăng hơlâ vâ hbrâ ví xía vâ kong prâi pro ôh tá tơniăn tung rơnó mêi têa kân lân lu la ngiâ. Malối, cheăm pơla hdrối kố nah hiăng tơbleăng mơjiâng pro 13 toăng hngêi hbrâ ví têa kân lân lu tung kuăn pơlê. Cheăm xuân hiăng tơrŭm ƀă Khu xiâm hbrâ ví xía vâ kong prâi pro ôh tá tơniăn tơkŭm po hnê hriâm vâ hlê plĕng, túa ki rơkê 'na hbrâ ví xía vâ kong prâi pro ôh tá tơniăn ăm kuăn pơlê; tơdrêng amê hlối hbrâ mâu plong ƀă ếo chhá ăm mâu thôn vâ hbrâ rơnáu. Pakĭng mê, cheăm xuân hiăng tơdah xo mâu ca nô plong tuk ki kơmăi ga têi vâ kum chơ kuăn pơlê lăm ối tíu tơniăn, hbrâ vía xía vâ kong prâi pro ôh tá tơniăn".

A chê Hòa Thịnh, cheăm Hoà Mỹ xuân cho tíu ki đi đo tro têa kân lân lu. Ƀai hriâm ki pá tung hnoăng cheăng hbrâ ví kong prâi pro ôh tá tơniăn a cheăm tung rôh têa kân lân lu ó mơ'nui hơnăm nah châ cheăm hriâm ƀối tơdroăng ki tro. Pôa Nguyễn Hữu Thuận, Kăn pơkuâ hnê ngăn cheăng Đảng cheăm Hoà Mỹ, kong pơlê Dak Lak tối ăm 'nâi:

“Ngin xuân hiăng hbrâ rơnáu ăm rêm kơpong kuăn pơlê rêh ối hbrâ môi toăng plong vâ pêi pro hnoăng cheăng tŏng kum, tŏng xo mơngế hliăng tiâ amê. Rêm thôn tiah mê kô ai môi khu tŏng kum xua mâu droh rơtăm, kuăn pơlê pêi chiâk deăng pơkuâ ngăn”.

Rơnó mêi 2026, mâu kơ koan, tíu pêi cheăng a kong pơlê Dak Lak hiăng pơkâ troăng pêi, hbrâ rơnáu xing xoăng lối 24.000 ngế kăn ƀô̆, mâu lêng rơtế dâng 35.000 toăng rơxế, plong, kế tơmeăm vâ pêi pro tơdroăng chơ djâ kuăn pơlê lăm ối tíu tơniăn, tŏng kum, tŏng xo mơngế hliăng tiâ ƀă tơkâ luâ mâu tơdroăng pá xua kong prâi pro tâng lơ ai tơdroăng xía vâ. Trung tă Phạm Thành Long, Kăn phŏ pơkuâ, Khu hnê mơhno gak kring kơpong 6, Khu pơkuâ ngăn lêng kong pơlê Dak Lak, ăm 'nâi:

“Tơkŭm po xing xoăng kế tơmeăm, rơxế tŏng gum, tŏng xo mơngế hliăng tiâ troh 18 Khu pơkuâ cheăng dêi cheăm tung kong pơlê rak tơniăn tŭm 'na kơxô̆ ăm mâu tíu pêi cheăng ƀă khu ki pêi hnoăng cheăng. Tung mê, kơjo kum tâ 'na kơxô̆ ăm mâu cheăm ƀă kơpong ki tơ'lêi trâm xía vâ, hmâ trâm xía vâ đi đo chiu tơdjâk xua kong prâi pro ôh tá tơniăn, malối cho kong mêi khía mơhot kân”.