Tung 6 khế apoăng hơnăm, hơnăm ối nếo kong pơlê Dak Lak hiăng tơkŭm pêi pro châ lối 4.000 to tơmeăm, xoăng cheăng ăm droh rơtăm ƀă tâi tâng kơnâ pro pơxúa lối 7,2 rơtal liăn. Ki nhên, rêm râ pơkuâ Đoân Droh rơtăm tung lâp kong pơlê hiăng bro 17 toăng hngêi hơ-ui, hngêi khăn quàng đỏ; pro 17km krâ pul on bâ eăng a troăng pơlê, 23 kơpong xah hêi ăm mâu phô̆m vâ xông kân; kum hên kơtuh mơ-éa ăm mâu phô̆m vâ xông kân; sơng, ‘mâi rơnêu lối châ toăng hngêi mơhno túa lĕm tro, hngêi hôp tơdjuôm.

Pơxiâm bro Hngêi hơ-ui ăm hok tro kơtiê a Dak Lak

Mâu tơdroăng “Hâi má tơdrốu ki mơhnŏng vâ xêh”, “Hâi tĭng ngiât lâp tơnêi têa” châ tơkŭm po hên tơdroăng, tơ’mot hên đoân viên, droh rơtăm veăng tung tơdroăng rak vế kong prâi tơnêi tíu, hbrâ ví ƀă kong prâi hơ’lêh a cheăm pơlê. Rơtế pêi cheăng rak vế tơniăn tơdroăng rêh kâ ối, tơdroăng ki pleăng hnoăng cheăng xua pơlê pơla, rêm râ Đoân tung kong pơlê hiăng diâp lối 20 rơpâu hnoăng tơmeăm, vâ chê 3 rơpâu hnoăng liăn hriâm rơkê, rơxế mái ăm kuăn pơlê, mâu phô̆m vâ xông; tơkŭm po khăm pơlât tê kơtê a mâu cheăm pơlê kơpong hngế hngo, kơpong xapá. Tâi tâng kơnâ cho lối 10 rơtal liăn.