VOV4.Xơ Đăng - Kal ‘mâi rơnêu tơdroăng ki pêi pro hrá tung hnoăng cheăng túa pơkâ, túa pơkâ xúa tơnêi, kố cho tơdroăng pơkâ thế dêi Khu kăn séa ngăn Hô̆i đong hnê ngăn kong pơlê Dak Lak a rôh pêi cheăng ƀă Vi ƀan hnê ngăn kong pơlê ‘na pêi pro troăng hơlâ, luât tơnêi tơníu pơla hơnăm 2016 – 2021 po a hai lơ 4/10.Tiô tối tơbleăng a rôh pêi cheăng, pơla hơnăm 2016 – 2021, Vi ƀan hnê ngăn kong pơlê Dak Lak hiăng kĭ pơkâ túa ki xúa tơnêi pơla hơnăm 2021 – 2030 dêi 13/15 tíu pêi cheăng.

Nôkố ối 2 tíu pêi cheăng tá hâi châ kĭ pơkâ cho pơlê kong kơdrâm Ƀuôn Ma Thuột ƀă tơring Ea Súp. ‘Na túa pơkâ xúa tơnêi rêm hơnăm dêi mâu tơring, pơlê krâm, pơlê kong kơdrâm, troh nôkố Vi ƀan hnê ngăn kong pơlê nếo kĭ pơkâ túa ki xúa tơnêi hơnăm 2022 ăm 6/15 tíu pêi cheăng, ối 9 tíu pêi cheăng nếo tá hâi châ kĭ pơkâ.

Mâu tíu pêi cheăng tối tơbleăng tơdroăng ki pơkâ túa ƀă khu ki séa ngăn

Tơpui a rôh séa ngăn, pôa Trần Phú Hùng, kăn phŏ hnê ngăn Hô̆i đong kong pơlê Dak Lak, pơkâ thế Vi ƀan hnê ngăn kong pơlê hnê mơhno mâu kơ koan ki ai tơdjâk mơdêk hnoăng cheăng hnê tối troăng hơlâ, luât ‘na túa pơkâ, túa ki xúa tơnêi; ‘mâi rơnêu tơdroăng ki hrá ƀă mơdêk ki rơkê plĕng tung mơjiâng túa pơkâ; teăm kĭ pơkâ túa ki xúa tơnêi râ tơring ƀă hên ki ê. Tung mê, tơmâng ngăn tâ nếo troh tơdroăng ki mơdêk rĕng tung tơdroăng ki bro, pêi klêi túa pơkâ xúa tơnêi dêi pơlê kong kơdrâm Ƀuôn Ma Thuột.

VOV Tây Nguyên/Tơplôu: Katarina Nga