VOV.Xơ Đăng - Dak Lak ai lối 1 rơpâu toăng hngêi trung ƀă hên hngêi trung tung mê đi đo nhăng hâ húa to rơxế, kuăn mơngế prôk lăm a kơpong bo cheăng maluâ a chôu mâu vâi o mot hriâm ƀă chôu ki lo ing hngêi trung, ing mê, khoh chiâng tơ’lêi ai tơdroăng ki ôh tá tơniăn. Hơnăm hriâm 2022-2023, kơnôm ai troăng hơlâ ki mơdât khu ngế tê mơdró kế tơmeăm pá ngiâ hngêi trung, hnê mơhno tối ăm nôu pâ, jâ pôa ƀă hok tro, ‘mâi rơnêu tơmeăm khoăng ki ai tơdjâk pá ngiâ hngêi trung, mê khoh chía tơniăn iâ; hên hngêi trung hiăng pá ai hâ ho drô bo cheăng hngêi trung.

Hngêi trung râ má môi Nguyễn Bỉnh Khiêm a tơdế pơlê kong kơdrâm Ƀuôn Ma Thuột, ôi a pái hơlâ troăng Nguyễn Đình Chiểu - Lê Thánh Tông. Kơpong kố, hdrối nah ai hên mâu ngế ki mơdró kế kâ peăng kơxo, kơphế, lơ rơxế trut pơto tê mâu kế kâ, ngăn chiâng hâ ho, kreăng tơvâ troăng prôk, rơxế ƀă kuăn mơngế. Laga, tơdroăng ki mê hơnăm kố ôh pá hlo ai xếo.

Jâ Nguyễn Thị Phương, ai hngêi ki ối achê mê tối ăm ‘nâi:

‘’Mâu hơnăm hdrối mê hía nah, nôu pâ chơ dêi kuăn ‘nĕng lăm hriâm to rơxế hon đa, ô tô, lơ lăm troh vâ tơdah dêi kuăn prếo, vâi hmâ tot hmâng to lo vâ drô kơpong bo cheăng hngêi trung; klêi mê, ai mơngế lăm ôu kâ a kuăn pá ngiâ bo cheăng, ai mâu ôu kơphế vâi xuân tot ‘măn dêi rơxế hon đa, rơxế ô tô ki kân a tơdế troăng, thăm nếo, vâi ối ‘măn rơxế a hang lơng, tíu ki mơdât, ôh tá ăm rơxế tot, tơkéa cho troăng ăm mơngế prôk chêng; ngế ki tê ƀă rơxế xuân ok dêi tơmeăm drô hang lơng, achê troăng prôk. Troh a chôu ki nôu pâ chiân dêi kuăn lăm hriâm ƀă chôu ki pơto xo dêi kuăn lo vê ing hngêi trung ga hâ ho, kreăng tơvâ tơvân ó khât, malối sap ing 5 troh 6 chôu kơxo lơ 4 chôu 30 troh 5 chôu peăng xê rêm hâi tung măng tĭng. Laga, hơnăm kố, á hlo tơdroăng kố hiăng chía tâ’’.

Kơpong bo cheăng Hngêi trung râ má môi Nguyễn Bỉnh Khiêm, pơlê kong kơdrâm Ƀuôn Ma Thuột dế nôkố ôh tá ai xếo tơdroăng ki tơvâ tơvân, hâ ho troăng prôk

Thái Lê Mai Thanh, Hnê hngêi trung râ má môi Nguyễn Bỉnh Khiêm tối ăm ‘nâi, hdrối vâ troh hâi pơxiâm mot hơnăm hriâm nếo 2022 – 2023, hngêi trung hiăng  hôp tâi tâng mâu thái cô, kăn ƀô̆, thái cô vâ pơkâ hnê, pơcháu hnoăng cheăng vâ pêi pro tung hơnăm hriâm, tung mê, ai tá tơdroăng ki kal athế rak vế tơniăn drô bo cheăng dêi hngêi trung. Khu pơkuâ ngăn hngêi trung hiăng mơjiâng khu ki pêi hnoăng cheăng tơrŭm ƀă mâu khu râ, kơvâ cheăng vâ xing xoăng troăng prôk, hnê mơhno tối ăm kuăn pơlê ‘nâi tíu ki tot ‘măn rơxế ăm i tơtro tiô pơkâ.

‘’Hngêi trung hiăng mơjiâng 3 khu, rêm khu ai sap ing 2 troh 4 ngế ki pêi hnoăng cheăng lăm vê hdró, kơchuâ, xing xoăng kơpong ki ăm nôu poâ hok tro tot ‘măn rơxế, chiân pơtroh, lơ troh pơto vêh dêi kuăn hriâm vâ pôi tá hâ ho drô troăng prôk. ƀă rơxế ô tô bố ăm phep tot tung to lâi yâi tê, ôh tá chiâng ăm tot ton, tâng nôu pâ ki vê rơxế ôh tá ai tíu vâ tot, mê kơ ai mơngế ki mơhno djâ vâi vê rơxế lăm tot a tíu ki chiâng phep; ƀă rơxế hon đa xuân ai tơdroăng hnê tối ăm tot ‘măn rơxế hon đa tro tơdroăng.

Hngêi trung hmâ tơkŭm xing xoăng mơngế ki pêi dêi hnoăng cheăng hnê mơhno ăm khu lâm ki mot lo ing hngêi trung, pơtroh, khu lâm 1 lo hdrối to lâi chôu, klêi mê, troh a lâm 2,3,4,5 lo to lâi chôu… hmốu pơ pro tiah mê. Drêng lo ing hngêi trung, mê tâi tâng bo cheăng hngêi trung athế lôu tâi tâng, ing bo ki kân xiâm troh a mâu bo ki kŭn xuân athế lôu bâ phuâng’’.

A pơlê kong kơdrâm Ƀuôn Ma Thuột, tơdroăng ki ôh tá tơniăn drô troăng prôk, malối a kơpong bo cheăng hngêi trung, môi tiah: Hngêi trung mâm non Họa Mi, hngêi trung râ má môi Nguyễn Đức Cảnh, troăng Phan Chu Trinh, Hngêi trung râ má péa Tân Lợi, troăng Ngô Quyền, Hngêi trung râ má môi Võ Thị Sáu, troăng Bà Triệu, Hngêi trung râ má môi Lê Hồng Gấm, troăng Lý Thường Kiệt lơ Hngêi trung râ má môi Nguyễn Bỉnh Khiêm, troăng Nguyễn Đình Chiểu ƀă hên hĕng mâu hngêi trung ki ê tung hơnăm nah hmâ hlo hâ ho ó khât, la hơnăm kố hiăng chía.

Trung tă Thái Văn Thìn - Kăn phŏ ngăn Kŏng an Pơlê kong kơdrâm Ƀuôn Ma Thuột tối, klêi kơ’nâi lăm mơnhên ngăn tâi tâng mâu hngêi trung ki ai bo cheăng hmâ hâ ho, Khu pơkuâ ngăn kŏng an hlo nhên, kơdró ki kơchuâ xing xoăng troăng ăm rơxế tot, prôk tá hâi tro khât, ing mê, khoh pro chiâng kơdrâm rơxế, mơngế hâ ho a bo cheăng hngêi trung.

Troh a chôu mot hriâm, lơ lo pơtê, Kŏng an pơlê kong kơdrâm Ƀuôn Ma Thuột pơrá ăm khu kŏng an gak ngăn, veăng hnê tối kuăn pơlê vâ kơdroh tơdroăng hâ ho drô bo cheăng hngêi trung

Khu pơkuâ ngăn kong an ‘na troăng prôk xuân hiăng tối ăm Vi ƀan hnê ngăn pơlê kong kơdrâm tah lôi tâi tâng mâu kế ki hâ ho a pái hơlâ troăng, 4 hơlâ troăng achê hngêi trung, hơ’lêh amê cho athế kơchuâ ƀă sơng, pro troăng bâ phuâng tơ’lêi prôk lăm. Tơdrêng amê, hnối xing xoăng hlá mơ-éa hnê tối ăm nôu pâ, hok tro thăm i hlê plĕng tơdroăng prôk lăm drô troăng; pơkâ thế mâu rơpŏng hngêi ki mơdró kâ athế rak vế tro luât rak vế troăng prôk vâ kơ tơniăn ăm mơngế prôk lăm; ki má lối kal athế ai xing xoăng mơngế kŏng an ki gak ngăn achê mâu troăng prôk troh a hngêi trung, rĕng rup tơleăng ƀă khu ngế ki pro xôi drô troăng prôk ƀă hên mâu tơdroăng ki ê.

Trung tă Thái Văn Thìn tối ăm ‘nâi:

‘’Kŏng an pơlê kong kơdrâm Ƀuôn Ma Thuột hiăng xing xoăng 3 rơpâu 400 kơtâ hlá mơ-éa hnê tối ăm 9 rơpâu 20 ngế hok tro, thái cô ‘na Luât prôk lăm drô troăng kân. Ăm thế 400 hdroh mâu kăn ƀô̆, mâu kŏng an gak ngăn troăng prôk, Kan sat gak ngăn troăng kơphô̆  ƀă kan sat gak tung kơpong veăng hnê tối mâu nôu pâ hok tro drêng chơ dêi kuăn ‘nĕng troh a hngêi trung athế tot tro drăng tíu pơkâ vâ pôi tâ hâ ho, kreăng tơvâ troăng prôk ƀă hnối hnê djâ ăm khu ngế, rơxế prôk lăm, tot pơtê tro tơdroăng achê bo cheăng hngêi trung’’.

Lâp kong pơlê Dak Lak dế kố ai vâ chê 500 rơpâu ngế hok tro hriâm a 1 rơpâu 71 toăng hngêi trung. Tiô pôa Đỗ Tường Hiệp, Kăn phŏ ngăn ‘na hnê hriâm ƀă hnê mơjiâng tuăn ngôa rơkê kong pơlê Dak Lak tối, tơdroăng ki hâ ho drô bo cheăng hngêi trung ti xê ai to a pơlê kong kơdrâm Ƀuôn Ma Thuột mê hlo ai hên a mâu kong pơlê ki ê tung hơnăm mê hía nah. Maluâ xuân tá hâi teăm ai tơdroăng xía vâ ki klâi hên, la tơdroăng ki pro hâ ho troăng prôk, pro ‘mêi troh tơdroăng prôk lăm, ki lĕm mơnâ dêi kơphô̆, pro pá ăm kuăn pơlê.

Hlo ai tơdroăng kố, drêng mot hơnam hriâm nếo kố, Khu ngăn ‘na hnê hriâm ƀă hnê mơjiâng tuăn ngôa rơkê hiăng pơkâ pêi pro mâu tơdroăng cheăng ki kal athế rak vế, vâ pôi tá ai xếo tơdroăng hâ ho drô bo cheăng hngêi trung, mê hơnăm kố, tơdroăng mê hiăng chía tơniăn tâ iâ.

‘’Tung pơla hdrối kố nah, kơvâ Hnê hriâm ƀă hnê mơjiâng tuăn ngôa rơkê kong pơlê Dak Lak hiăng pơtroh hlá mơ-éa pơkâ thế mâu hngêi trung thăm mơdêk tơdroăng ki hloh hlê dêi hok tro, pơkâ thế mâu vâi o ‘nâi nhên tơdroăng pơkâ drêng troh a bo cheăng hngêi trung athế rak tơniăn tơdroăng prôk lăm.

Hnê mơhno tối troh nôu pâ vâi o hok tro, Khu pơkuâ ngăn nôu pâ hok tro xuân athế hlê plĕng vâ hnê tối ăm mâu nôu pâ hok tro tung hngêi trung. Ki rơhêng vâ tối, mâu hngêi trung athế tơrŭm ƀă mâu khu râ, kơvâ cheăng, tơring, cheăm, bêng, pơlê kân, pơlê krâm, khu kŏng an, lơ Đoân Droh rơtăm ki pleăng dêi hnoăng cheăng vâ veăng kum kring vế tơniăn tơdroăng prôk lăm a drô bo cheăng hngêi trung’’.

            Tuấn Long/VOV Tây Nguyên/Tơplôu: Nhat Lisa