Kơxo lơ 22/12, Kăn hnê ngăn kong pơlê Dak Lak hiăng lăm pôu, hbru tơmeăm ƀă rơkâu hâi Tĭng kân Noel a Tòa Giám mục Giáo Phận Ban Mê Thuột ƀă  Vi ƀan tơrŭm tuăn khu tiô khôp kong pơlê ƀă Chi hô̆i  Tin Lành Buôn Ma Thuột. A tíu lăm pôu, mâu kăn kong pơlê Dak Lak hiăng pơtroh rơkong rơkâu hâi Tĭng kân Noel troh ƀă mâu ƀok xối, mâu jâ chĭng, mâu cheăng tơdroăng khôp, kuăn pơlê ki tiô khôp tung kong pơlê ƀă mâu tơdroăng ăm ‘nâi mâu tơdroăng hiăng pêi pro tung mâu tơdroăng cheăng dêi kong pơlê tung hơnăm kố. Kăn hnê ngăn kong pơlê Dak Lak tối: ai tiah mê cho kơnôm mơ-eăm dêi tâi tâng kuăn pơlê, tung mê ai kuăn pơlê ki tiô khôp Pâ Xeăng, Tin Lành.

Pakĭng mê, mâu kăn kong pơlê Dak Lak púi vâ mâu ƀok xối, jâ chĭng mâu ngế veăng pêi hnoăng cheăng ‘na tơdroăng khôp, ƀă mâu kuăn pơlê tiô khôp pơtối rak vế tơdroăng pâ nhoăm tơnêi têa, rơtế ƀă mâu hdroâng kuăn ngo, pơtối rak vế pêi pro mâu hnoăng cheăng ki hiăng châ chiâng pêi pro, veăng ‘no hên tâ nếo tung mơjiâng kong pơlê Dak Lak, kro mơdrŏng, rơkê plĕng.