Mâu tơdroăng ki po xah hêi ăm vâi hdrêng hiăng châ pơxúa khât, pro hên ngế nôu pâ vâi muăn hdrêng rơhêng vâ chêh inâi ăm dêi kuăn ‘nĕng tơkŭm châ xah ôm hêi a tíu mơhno túa lĕm tro.

Rơnó pơtê hơnăm 2023 kố cho hneăng pơtê ki tơxâng pâ ƀă o Huỳnh Tấn Đạt, lâm 5, Hngêi trung râ má môi Lê Hồng Phong, tơring MDrak, drêng châ nôu pâ ăm veăng roh xah pro Kan sát hbrâ tơpâ on chếo a Tíu xiâm pơkuâ hnê mơhno Kan sát hbrâ tơpâ on chếo ƀă tŏng xo mơngế hliăng tiâ Kŏng an kong pơlê Dak Lak.

Tung roh xah pro kố, tâng châ plah châ to rơxế tơpâ on, toi klŏng tơpâ on chếo rơtế mâu ngế Kan sát hbrâ tơpâ on chếo ƀă pêi pro mâu tơdroăng pĕng têa tơpâ on; kơtâu hluăn drêng ai on chếo.

‘’Veăng lâm pơtâp, á o châ hriâm ‘na kơtâu hluăn drêng ai on chếo, ƀă hriâm tơ’nôm châ hên tơdroăng ki hâk vâ hriâm nếo’’.

Xuân veăng roh châ xah pro Kan sát hbrâ tơpâ on chếo, o Nguyễn Ngọc Quỳnh Anh, hok tro lâm 5 Hngêi trung râ má môi Hoàng Việt, pơlê kong kơdrâm Ƀuôn Ma Thuột, tối:

‘’Hâi kố cho roh apoăng á kuăn châ râng klŏng pĕng têa vâ tơpâ on chếo, á kuăn ro ‘nâng. Klêi kơ’nâi châ xah, á kuăn hâk vâ tơdroăng cheăng dêi mâu tăm hbrâ tơpâ on chếo’’.

Pakĭng mâu lâm hnê tơ’nôm tơdroăng, hriâm a rơnó pơtê, lơ lôi ăm vâi hdrêng xah hêi xêh a hngêi, to lâi hơnăm achê kố, mâu rơpŏng ƀă hngêi trung hriâm a Dak Lak hiăng tơmâng hên tâ troh tơdroăng ăm vâi hdrêng veăng mâu tơdroăng xah pá kong hneăng môi tiah ti tăng plĕng loăng pơlái kong kế, tơdroăng mơnhông mơdêk; châ xah pro kuăn pơlê pêi chiâk deăng; mâu lâm hnê tơdroăng rêh ối; hriâm pro mô đô̆i; lêng gâk kring têa kơxĭ; kan sát hbrâ tơpâ on chếo; kơdrâm phiu ro rơnó pơtê hriâm hriâm nâl Ăng-glê; mâu lâm hnê klê têa, hriâm tơchok, peăng xâk í, kơtú ƀa long ƀă hía hé.

Ngoh Nguyễn Văn Hiển, ối a bêng Tân Lập, pơlê kong kơdrâm Ƀuôn Ma Thuột, tối mâu tơdroăng xah pro môi tiah kố kô kum ăm mâu kuăn hên ‘nâng:

‘’Pói vâ dêi rơpŏng cho vâ mâu muăn ai tíu xah hêi pơxúa, má péa nếo, cho mâu muăn châ achê, châ tâ ƀă chôu vế mâu tơdroăng ki rơkê nôkố. Mâu tơdroăng ki khât kố kô rơtế mâu kuăn tung tơdroăng rêh ối. Kố cho tơdroăng ai pơxúa, kum vâi hdrêng châ xah pro ƀă mơnhông mơdêk tâi tâng’’.

Kong pơlê Dak Lak nôkố ai dâng 508 rơpâu ngế vâi hdrêng, tơdroăng kal vâ veăng mâu lâm hriâm tơdroăng rêh ối tung roh rơnó pơtê hriâm cho hên. Jâ Nguyễn Thị Thúy Hiền, Kăn phŏ pơkuâ Hngêi mơhno khôi túa lĕm droh rơtăm kong pơlê Dak Lak (ối tung Khu pơkuâ Đoân Droh rơtăm Dak Lak) tối ăm ‘nâi, rế hía rế ai hên nôu pâ kĭ ăm kuăn ‘nĕng veăng mâu lâm hriâm ‘na tơdroăng rêh ối, văn hok ngê̆ thuât, pơtâp ivá; xah pro mô đô̆i, kan sát hbrâ tơpâ on chếo, lêng gâk kring tung dế têa kơxĭ.

Tơxâng tơdroăng kal mê, rơnó pơtê hriâm hơnăm 2023 kố, tíu cheăng hiăng tơkŭm po lối 100 lâm hriâm tŭm tŭm túa ƀă hiăng mơhnhôk vâ chê 5 rơpâu roh vâi hdrêng a pơlê kong kơdrâm Ƀuôn Ma Thuột, mâu tơring ki achê mê môi tiah Ƀuôn Đôn, Čư Mgar, Krông Păč ƀă hía hé.

Tiô jâ Hiền, sap ing kố troh tâi rơnó pơtê hriâm, kô ai tơ’nôm hên tơdroăng ki pơxúa ăm vâi hdrêng a mâu tơring tung tâi tâng kong pơlê:

‘’Hbrâ ăm mâu tơdroăng pêi rơnó pơtê hriâm hơnăm 2023, Khu pơkuâ Đoân droh rơtăm kong pơlê hiăng pêi pro mâu tơdroăng pêi cheăng rơnó pơtê hriâm troh mâu kơ koan a tơring, pơlê kong kơdrâm, Khu pơkuâ Đoân droh rơtăm pơlê kong kơdrâm vâ tơkŭm po mâu tơdroăng lâm hriâm rơnó pơtê hriâm pêi tơdroăng ki lĕm ăm tâi tâng mâu vâi hdrêng tung kong pơlê Dak Lak.

Tiô séa ngăn dêi ngin ƀă hiăng hlo nhên, hên kơ koan, tíu cheăng hiăng tơkŭm po mâu lâm hriâm, tơdroăng pêi cheăng rơnó pơtê hriâm ăm mâu vâi o veăng xah châ tâ tiô tơtro ƀă rêm rơxông hơnăm ƀă tơdroăng kal vâ dêi mâu vâi o, ƀă tơdroăng ki ai khât nôkố a rêm kơ koan, tíu cheăng.

Ki nhên, mâu tơring Krông Ana, Krông Păč lơ pơlê kong krâm Ƀuôn Hồ hiăng tơkŭm po mâu tơdroăng kal khât ăm mâu vâi o hriâm klê têa tê kơtê, hriâm văn hŏa ngê̆ thuât, tơkŭm po mâu tơdroăng xah hêi pakong chôu hriâm ăm mâu vâi ‘’.