Thươ̆ng tă Trịnh Ngọc Kiệm, Đô̆i trưởng đô̆i K51, Khu pơkuâ ngăn lêng kong pơlê Dak Lak ăm ‘nâi, klêi kơ’nâi vâ chê 7 khế chu văng, hếo ngo, tơkâ luâ mâu têa kroăng, tơkâ luâ kong, rơtế ƀă tơdroăng ki veăng kum ƀă tơdroăng tơrŭm dêi khu kăn pơkuâ, khu lêng kring vế tơniăn ƀă kuăn pơlê kong pơlê Mondulkiri, Đô̆i kố hiăng tăng hlo, tơkŭm kơxêng kiâ mố đô̆i ki hlâ djâ vêh a tơnêi Xiâm.

Troh nôkố, kong pơlê Dak Lak hiăng tí tăng, tâp ‘mế, tơkŭm châ 719 to kơxêng kiâ mâu ngế ki pleăng dêi hnoăng ƀă khu ki rơkê Việt Nam hlâ tung rôh tơplâ dêi mâu chal hdrối nah a kong pơlê Mondulkiri, kong têa Kul djâ ‘mế tơniăn a tơnêi xiâm dêi tơná.