Hneăng tơ’noăng mơgêi râ má pái phôh thong tơnêi têa hơnăm 2023 a măng tĭng la ngiâ, lâp kong pơlê Dak Lak ai lối 21 rơpâu ngế hok tro chêh dêi inâi tơ’noăng a 33 tíu, tâi tâng ai 900 to kơbong tơ’noăng. Rak vế mơ’no on tơhrik tơniăn ăm hneăng tơ’noăng mê ah, kơvâ ngăn ‘na on tơhrik Dak Lak hiăng lo lăm ngăn tâi tâng troăng kơxái on a tơrêm tơring, pơlê kong krâm, pơlê kong kơdrâm, vâ kơ tơniăn đi đo ai on tơhrik kum hlâu ăm hneăng tơ’noăng mơgêi râ má pái phôh thong.

Tiah mê, mâu khu râ, kơvâ cheăng thăm rế mơdêk seá ngăn, rak vế, kring tơniăn troăng kơxái on, hngêi kơmăi on ki ai tơdjâk troh on tơhrik vâ đi đo tơniăn ăm tơdroăng in mơ’no, chêh tối ‘na ko ƀai tơ’noăng, kơpong châm tơ’noăng, klêi mê, rĕng ai troăng hơlâ ki vâ tŏng kum rĕng tơdrêng tâng lơ tro tơpâ on tơhrik. Kơvâ ngăn ‘na on tơhrrik xuân hiăng ăm mâu kăn ƀô̆, mơngế cheăng ngăn ‘na on tơhrik gak ngăn plâ hâi plâ măng, ai tŭm kơmăi kơmok, rơxế, kế tơmeăm vâ rĕng teăm tŏng kum tơdrêng tâng lơ ai tơdroăng xía vâ.

Tơdrêng amê, khu ngăn on tơhrik xuân hiăng kơhnâ khât tung pêi cheăng, tơrŭm cheăng ƀă mâu kơ koan ai tơdjâk troh vâ thăm mơdêk tơdroăng kring vế, rak ngăn tơniăn tơdroăng ki hok tro prôk lăm tơ’noăng, mâu thái cô, kăn ƀô̆ pêi hnoăng cheăng tung roh tơ’noăng mơgêi râ má pái phôh thong kố ah.