Kơxo lơ 14/6, Hô̆i đong hnê ngăn kong pơlê Dak Lak tơkŭm po Hneăng hôp ‘na tơdroăng rôh má 9, hneăng 10, pơla hơnăm 2021 – 2026 vâ tơbleăng dêi tơdroăng pơkâ ki kal tơdjâk troh mơnhông mơdêk cheăng kâ rêh ối pơlê pơla dêi kong pơlê. Tung rôh hôp, Hô̆i đong hnê ngăn kong pơlê Dak Lak xuân hiăng pôk tơ’nôm kăn phŏ hnê ngăn Vi ƀan kong pơlê, hneăng 10, pơla hơnăm 2021 – 2026.

A hneăng hôp, mâu kăn hiăng séa ngăn, mơnhên tối ƀă tơbleăng mâu hlá mơ-éa, pơchuât séa ngăn ‘na kơxop hlá mơéa ‘na kĭ pơkâ ‘mâi rơnêu pơtê ‘no hrê liăn ngân kong pơlê hơnăm 2021; yă kế tơmeăm, kế tơmeăm xúa tơdjuôm mơjiâng rơchôa, hno têa hơnăm 2022 ƀă long têa xúa liăn Tơnêi têa a kong pơlê; pơkâ tơdroăng kal, kơlo hrê troăng ki xúa ăm mâu tíu ki mơgât pâk chik xúa trếo ma tŭi ki pơklât thế, hnoăng cheăng mơgât pâk chik xúa trếo ma tŭi ki mơhnŏng vâ xêh dêi a hngêi, tíu rêh ối, tíu ki mơgât pâk chik xúa trếo ma tŭi ƀă pơkuâ ngăn klêi kơ’nâi mơgât pâk chik xúa trếo ma tŭi a kong pơlê; troăng hơlâ tŏng kum mâu ngê̆ nhân a kong pơlê Dak Lak, pơla hơnăm 2023 – 2025.

A hneăng hôp kố hiăng pôk tơ’nôm kăn phŏ Vi ƀan hnê ngăn kong pơlê cho pôa Nguyễn Thiên Văn, ngế cheăng tung pơkuâ hnê ngăn Đảng, kăn pơkuâ ngăn Đảng tơring Ea Súp, Kăn hnê ngăn Vi ƀan tơring Ea Súp. Ƀă kơxô̆ phĭu pôk châ 98,5%, pôa Nguyễn Thiên Văn châ pôk bro kăn phŏ Vi ƀan hnê ngăn kong pơlê hneăng 10, pơla hơnăm 2021 – 2026.