Tối tơbleăng a rôh pêi cheăng, pôa Lương Nguyễn Minh Triết, Kăn pơkuâ hnê ngăn Tỉnh ủi Dak Lak ăm ‘nâi, cheăng kâ - pơlê pơla pái khế apoăng hơnăm vâ tối tơniăn ƀă pêi châ hên tơdroăng ai pơxúa. Tối ‘na cheăng kâ pơtối po rơdâ, GRDP tiô yă nôkố pêi châ lối 48.400 rơtal liăn, tâk 11,7% tâng vâ pơchông ƀă hơnăm 2025.

Laga, riân kơlo ki tâk GRDP, kong pơlê pêi châ dâng 7,5%; liăn ngân ‘no pro tơmeăm khoăng ăm tơnêi têa hrá; ‘na chêl thiăn liăn xua ‘mâi xĕn hngêi trăng tơnêi tíu vâ pro tơdroăng tơkêa bro ối trâm hên xơpá; tơdroăng tah túa pro hlá mơ-éa ăm mâu tơdroăng tơkêa bro hâi pêi teăm tơdrêng tơdroăng pêi chiâk tê mơdró trâm hên xơpá.

Kăn pơkuâ hnê ngăn Tỉnh ủy kong pơlê Dak Lak tối tiah kố vâ pêi ai tiô pơkâ tâk 10% tơngi klêng, tơdroăng kal vâ tăng liăn tung la ngiâ gá hên, luâ ivá dêi hngêi rak liăn kong pơlê. Xua mê kong pơlê pâ thế Tíu xiâm tơnêi têa ai pơkâ mơhnhôk tăng liăn ing kuăn pơlê ki mơdró kâ kro mơdró, po rơdâ ivá tăng châ liăn ODA, hlối pro hlâu tơ’mot khu ‘no liăn cheăng pêi a mâu kơvâ cheăng kơmăi kơmok ki dâi lĕm logistics, uâ pơli pro tơmeăm pê lo ing chiâk deăng  hlối  pro mơdrăn chĕm mơnăn ƀă kơmăi ki dâi lĕm. Dak Lak xuân pâ thế pơkâ luât rơkê ƀeăn vâ tê mâu tơmeăm ki rơlối, pro tơmeăm ki xiâm vâ mơnhông cheăng kâ.

“Nôkố kong pơlê hiăng ai troăng hơlâ tâi, troăng hơlâ vâ tơbleăng pêi nhên ki pơ’lêh ga pá, malối a kơpong Peăng mâ Hâi lo, tơmeăm khoăng ối hên, ăm mung ôh ti ai kơbố vâ mung, tê ôh tá ăm tê, pơ’lêh chiâng tíu pêi cheăng, hngêi pơkeăng mê tối ôh tá tơtro mê púi vâ Tíu xiâm tơnei têa tăng ‘nâi plĕng vâ ai troăng hơlâ pơkâ ki tơtro  tơ’lêi hlâu, sap ing râ xiâm tơnêi têa mê kong pơlê nếo ai troăng hơlâ ki nhên vâ pơ’lêh chiâng mâu tơmeăm khoăng ki mê vâ pơxúa ăm tơdroăng mơnhông tơƀrê tâ”.

Tối tơbleăng a rôh pêi cheăng, pôa Nguyễn Thanh Nghị khĕn kơdeăn ki kơdôu mơ-eăm dêi kong pơlê Dak Lak tung pơla ối trâm hên xơpá, la kong pơlê kal pơkâ pêi kơtăng tâ nếo tung hnoăng cheăng pơkuâ hnê ngăn, malối cho tăng liăn ngân ‘no mơjiâng pro tơmeăm khoăng dêi tơnêi têa, tah mâu tơdroăng tơkêa bro ki u ối ƀă kơdroh kơxô̆ rơpŏng kơtiê.

Pôa xuân tối pơchân, klêi môi tuăn tung kong pơlê, Dak Lak ai tơnêi tíu lĕm hên túa la mâu tơmeăm khoăng  ki pơjiâng pro tơdjêp ƀă, mơngế ki pêi cheăng ƀă ivá pêi cheăng ‘na hơ’lêh kơxô̆ hâi rơkê, tơdjâk troh vâ châ tâk ‘na cheăng kâ.

“Pâ thế tăng ngăn nếo tơdroăng chêh bro hlá mơ-éa ƀă ai pơkâ nhên ăm tơrêm kơvâ cheăng, tơrêm tơdroăng cheăng ăm mâu tơdroăng tơkêa bro ki vâ veăng ‘no  ăm châ tâk. Nôkố pơkâ hdró ti lâi, vâ tơniăn ăm vâi vâ ‘no liăn mơjiâng pro tơmeăm khoăng mê mơngế ki pêi cheăng ti lâi, tơdjêp troăng prôk hôm tơ’lêi hlâu há. Pin hiăng xơpá púi vâ khu ‘no liăn mơjiâng pro troh akố thế ai tơmeăm ki hôm tâ pú mê nếo châ tơ’mot mơngế troh ôm hyô, ki hdrối hâi tơ’mot ‘no liăn cheăng mê hâi pêi pro klêi mâu tơdroăng tơkêa bro ki u ối tơvâ tơvân”.

Ing mâu troăng hơlâ ƀă hnê mơhno a rôh pêi cheăng, kô ăm hlo nhên tơdroăng pơkâ ƀă kong pơlê Dak Lak ôh ti xê to pơtê dâng a tơdroăng pơkâ luât, mê kal tâng kô tơkŭm pêi tơƀrê, djâ pêi mâu troăng hơlâ, pơkâ dêi Đảng kô xúa tung rêh ối. Vâ ti mê, kong pơlê  kal thế pêi kơtăng tah ki xơpá, po troăng pêi, pro xiâm tơ’lêi vâ tơ’mot khu ‘no liăn cheăng mơdêk tâk tơƀrê. Tơrêm tơdroăng cheăng pêi châ tơbleăng pêi tơdrêng, rơtế ƀă hnoăng pêi mơhno nhên, pơkâ dêi Đảng kô ôh ti xê to troăng hơlâ mê ối chiâng tơdroăng pêi pro mơnhông tơƀrê, veăng ‘no hnoăng mơnhông kong pơlê  Dak Lak xông tơƀrê rĕng ƀă krá ton tung mâu hơnăm la ngiâ.