Tung rôh lăm pêi cheăng a kong pơlê Dak Lak, pôa Nguyễn Thanh Nghị, Ngế pơkuâ ‘na luât, troăng hơlâ Tíu xiâm hiăng pêi cheăng ƀă kong pơlê ‘na tơbleăng pêi mơnhông cheăng kâ pơlê pơla. A rôh pêi cheăng, kong pơlê Dak Lak pâ thế Tíu xiâm rĕng pơkâ luât ki krê xêh vâ tơniăn châ tơ’lêi hlâu pro xiâm ki ai khât tro tiô tơdroăng pơkâ tâk châ péa kơxô̆.

Cheăng kâ - pơlê pơla pái khế apoăng hơnăm vâ tối tơniăn ƀă hlo châ tơƀrê hên. Ki kân ‘na cheăng kâ pơtối po rơdâ, riân ki tâk tơdjuôm dêi kong pơlê tiô yă nôkố châ lối 48.400 rơtal liăn, tâk 11,7% tâng vâ pơchông ƀă hơnăm 2025.

Tối tơbleăng a rôh pêi cheăng, pôa Nguyễn Thanh Nghị khĕn kơdeăn  ki mơ-eăm dêi Dak Lak tung pơla ối hên xơpá, la kong pơlê kal thế pêi kơtăng tâ tung pơkuâ ngăn, malối xo liăn ngân pêi cheăng pro tơmeăm khoăng, tah mâu tơdroăng tơkêa bro ki u ối ‘ro hâi teăm kêi ƀă kơdroh kơxô̆ rơpŏng  kơtiê.