Ki tâk GRDP pái khế apoăng hơnăm 2026 dêi Dak Lak riân châ dâng 7.5%, iâ tâ tơdroăng pơkâ, pro pá kân ăm mâu khế ki pơtối mê dêi hơnăm. A rôh hôp, hên ngế veăng tối tơdrăng mơhno ki ối pá, pêi hâi tro, ‘mâi hơ’lêh hlá mơ-éa, ki pêi tơdroăng tơkêa bro ƀă kơxô̆ liăn châ xo, pơkâ thế pơcháu ăm pơkuâ tiô hlá mơ-éa chêh tâk nhên, rơtế ƀă tơrêm kơvâ cheăng dêi cheăm bêng.

Kăn hnê ngăn kong pơlê Dak Lak pơkâ thế séa ngăn kơlo ki tâk tiô tơrêm khế, mơnhên tơdroăng pôu râng pêi pro tơrêm kơvâ cheăng. Mâu tơdroăng hnê tối mê xuân tối nhên tung ‘mâi hơ’lêh túa pro hlá mơ-éa ối hrá, hâi ai tiô púi vâ, pro pá ăm tíu pêi cheăng. Pôa Lương Nguyễn Minh Triết, Kăn pơkuâ hnê ngăn Tỉnh ủi Dak Lak pơkâ thế tơkŭm pêi nhên mâu tơdroăng ki hâi klêi dêi tơdroăng tơkêa pro mâu tơmeăm tung kơdâm tơnêi, on tơhrik, ôm hyô ƀă mơdêk rĕng pro klêi hlá mơ-éa. Ing troăng pêi mê dêi Dak Lak: ôh tá lôi tơniăn ăm pin mê ối pro pá khu mơdró kâ... kong pơlê Dak Lak ‘nâi nhên ki pơ’lêh tuăn tơmiât, kơdroh hên hâi khế ƀă kơxô̆ liăn pro hlá mơ-éa vâ kum châ tâk, ƀă tâk rơdêi hên.