Mâu kăn ƀô̆, giảng viên, ngế hriâm lâm hnê tơ’nôm vâ hriâm tơdroăng cheăng lêng ƀă kring tơniăn rơtế ƀă khu râ kăn pơkuâ kong pơlê, mâu khu râ, kơvâ cheăng tơpui tơno 'na mâu tơdroăng lĭ luâ̆n ƀă ki ai khât tung mơnhông cheăng kâ - rêh ối pơlê pơla rơtế ƀă tơdroăng cheăng lêng, gâk kring. Môi tơdroăng châ tối rơdêi rôh pêi cheăng cho mơnhông cheăng kâ thế prôk rơtế mơjiâng kơpong gâk kring ƀă 'mâi mơnhông "tơdroăng gâk kring hiâm mơno kuăn pơlê". Tiah mê, mơdêk tơdroăng rêh ối, kơdroh kơtiê, rak tơniăn tơdroăng rêh ối, mơjiâng tơdroăng cheăng kâ krá tơniăn ăm kuăn pơlê, malối cho a kơpong tơkăng kong ƀă kơpong hdroâng kuăn ngo, ôh tá xê to hnoăng cheăng mơnhông mê ối veăng kum rak tơniăn ing pơlê pơla.

Pôa Nguyễn Minh Triết, Kăn pơkuâ hnê ngăn cheăng Đảng kong pơlê Dak Lak tối rơdêi, thế pêi pro pơkâ mơnhông cheăng kâ – rêh ối pơlê pơla ƀă pơkâ pêi tơdroăng gâk kring tơnêi têa, kring tơniăn sap apoăng, ki má lối cho mâu tơdroăng tơkêa bro kân, troăng klông pêi cheăng ton xŏn ƀă pơlê cheăm ki kal.