VOV4.Xơ Đăng - Kơxê lơ 9/9, Khu hnê mơhno dêi tíu xiâm tơnêi têa mơgêi 10 hơnăm rak vế pêi pro tơdroăng pơkâ kơxô̆ 09/2022 dêi Khu xiâm ngăn cheăng kal kí ‘na mơjiâng ƀă mơnhông hnoăng cheăng dêi khu mơdró kâ Việt Nam tung hneăng thăm mơdêk cheăng kơmăi kơmok, pêi pro mâu tơdroăng cheăng chal nếo ƀă tơrŭm rơdâ ƀă mâu kong têa ki kro mơdrŏng hiăng ai roh pôu, pêi cheăng a kong pơlê Dak Lak ‘na rak vế, pêi pro tiô tơdroăng pơkâ kơxô̆ 09 a kong pơlê.

Dak Lak dế nôkố ai lối 11 rơpâu 100 khu mơdró kâ dêi pêi cheăng, tâi tâng kơxô̆ liăn ki pêi cheăng kâ lối 84 rơpâu rơtal liăn, tâk châ 2,7 hdroh ‘na kơxô̆ ki hên iâ ƀă 2,1 hdroh ‘na kơxô̆ liăn dêi môi khu mơdró kâ tâng vâ pơchông ngăn ƀă hơnăm 2011. A chôu phut pêi cheăng mê, kong pơlê Dak Lak hiăng pâ thế mâu khu ngăn ‘na tơdroăng cheăng xiâm tơnêi têa hriăn plĕng, mơ’no mâu troăng hơlâ vâ tŏng kum, thăm mơdêk thế mâu khu mơdró kâ mơdêk tơdroăng ki tơbriât tê mơdró kâ, ki má lối ƀă mâu khu mơdró kâ ki ối trâm hên xahpá kal athế thăm mơdêk ó tâ nếo.

Tơmâng mâu rơkong veăng tơpui tối dêi kong pơlê, pôa Đỗ Ngọc An, Kăn phŏ hnê mơhno tơdroăng cheăng kâ dêi tơnêi têa tối ăm ‘nâi, Dak Lak kal athế mơjiâng khu ki mơdró kâ, mơnhông tơdroăng ki ai hlâu mâu tơmeăm khoăng ki kong pơlê kố hiăng ai hlâu.

Nhat Lisa tơplôu ƀă tơbleăng