VOV4.Xơ Đăng - Kơxê lơ 9/9, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Alounxai Sounnalath Sang, ngế xiâm pơkuâ, kăn pơkuâ Ƀơrô cheăng Ngế pro xiâm hnê ngăn kong têa Lếo lăm pôu, pêi cheăng a Việt Nam hlối veăng tơkŭm po Rôh hôp tơpui tơno, tối ‘na ki rơkê plĕng ăm Ƀơrô cheăng Chin phuh Việt Nam tung hnoăng cheăng tí tăng ‘nâi plĕng tơkŭm kum Chin phuh, Ngế pro xiâm hnê ngăn Chin phuh.

A rôh tơdah, Ngế pro xiâm hnê ngăn tơnêi têa pơkâ thế tung la ngiâ ah, péa Ƀơrô cheăng tơbleăng tơƀrê Hlá mơ-éa chôu vế ‘na túa pơkâ tơrŭm cheăng hneăng hơnăm 2022 – 2023; pơtối tơrŭm tối ăm dêi rơpó mâu tơdroăng ki rơkê tung tơleăng mơnhên tơdroăng cheăng tơbleăng tơƀrê mâu kơxop hlá mơ-éa tơrŭm cheăng, rế hía rế mơdêk tâ nếo ki rơkê tung hnoăng cheăng tí tăng ‘nâi plĕng tưkŭm kum Chin phuh, Ngế pro xiâm hnê ngăn Chin phuh.

Ngế xiâm pơkuâ, kăn pơkuâ Ƀơrô cheăng Ngế pro xiâm hnê ngăn kong têa Lếo tối nhên, Lếo đi đo ngăn nhuô̆m, rơhêng vâ rak vế tơbêng ƀă mơnhông tơrŭm cheăng kân rơdêi ƀă tơrŭm tơviah pơla Lếo – Việt Nam, ăm ‘nâi kô kơhnâ tơbleăng mâu tơdroăng ki pơkâ thế, tơkêa dêi kăn pơkuâ râ kăn xiâm péa tơnêi têa, kum mơdêk tơrŭm cheăng tơrŭm ki kăn pơkuâ Đảng, Tơnêi têa ƀă kuăn pơlê péa tơnêi têa hiăng tơbêng rế hía rế prôk mot trâu hơngế, ai pơxúa ƀă tơƀrê tung tâi tâng mâu kơvâ cheăng, pro pơxúa ăm kuăn pơlê rêm to kong têa.

Katarina Nga tơplôu ƀă tơbleăng