To lâi hâi kố jâ H’Juaih Mlô (ối khĕn nôu Oanh), ối a ƀuôn Pưk Prong, cheăm Ea Ning, tơring Čư Kuin, kong pơlê Dak Lak, pêi cheăng sap ing kơxo má, hbrâ pế pơchên hmê kơchâi kâ ăm khu cheăng a tíu gâk kring mơ’nui pơlê. Tơmeăm kâ ki xiâm mê cho khu râ kăn pơkuâ djâ ăm, tơmeăm ki hơ’lâk ăm kơhiâm, hăng mê cho kuăn pơlê tơ’nôm tung kơchâi kâ.

Rơtế veăng tŏng kum pế pơchên hmê kơchâi kâ ai hên vâi o ối kŭn tung hngêi, tung kơtâu, xua mê, mâu hnoăng hmâ kơchâi kâ drêng lâi xuân tơniăn ối tô lĕm djâ troh tíu ki gâk. Kố cho hiâm mơno dêi vâi krâ kuăn pơlê tung pơlê, mơhnhôk mâu kăn ƀô̆, mâu lêng dế pêi hnoăng cheăng gâk kring tung mâu hâi hiăng hluâ.

“Ai khu râ kăn kơpêng ăm tơmeăm kâ kố, ai há ki vâi krâ kuăn pơlê tŏng kum môi iâ mâu kơchâi kâ kố vâ pế kâ, vâ tŏng kum, mơhnhôk hiâm mơno tâi tâng nhŏng o khu lêng kuăn pơlê xuân môi tiah kŏng an tung pơlê, mơhnhôk hiâm mơno vâ gak ngăn, gak kring tơniăn ăm pơlê xuân môi cho cheăm ngin ăm gá tơniăn’’.

 Ôh tá xê krê to hngêi jâ H’Juaih, hên rơpŏng ki ê tung cheăm Ea Ning xuân kĭ ƀă khu râ kăn pơkuâ vâ pế mâu hnoăng hmê kơchâi kâ tŏng kum, veăng mâu khu cheăng dế pêi hnoăng cheăng gak kring a tơring Čư Kuin. Nâ Nguyễn Thị Nhị, Kăn hnê ngăn Khu pơkuâ vâi kơdrâi cheăm Ea Ning tối ăm ‘nâi, khu vâi kơdrâi hiăng pêi pro vâ vâi nâ o veăng tŏng kum ‘na kế tơmeăm khoăng ƀă hiâm mơno vâ ai hmê kơchâi kâ tŭm trếo piê kơhiâm, tơniăn ivá ƀă ivá tơplâ ăm kăn ƀô̆, mâu lêng dế pêi hnoăng cheăng. Mâu hâi hiăng hluâ, hiăng ai hrĭng hnoăng hmê, kế kâ châ kuăn pơlê hbrâ ƀă djâ Vi ƀan cheăm vâ pơtroh troh mâu tíu gâk.

“Nâ o a mâu chi hô̆i thôn, pơlê cho pêi tá hiâm mơno, veăng tơlo hnoăng, veăng kum ivá, tŏng kum môi iâ vâ pế pơchên hmê kơchâi kâ. Pakĭng pế pơchên hmê kơchâi ai mâu nâ xuân veăng ƀă khu lêng kuăn pơlê a mâu thôn, pơlê. Tâi tâng cho a mâu chi hô̆i mê vâi ai ki klâi mê vâi djâ troh a tíu pêi cheăng Vi ƀan, ngế ki ‘nâ kum phái, ngế ki ‘nâ kơchâi plâi pôm, tá liăn ngân vâ veăng tŏng kum.

Tung mâu hâi hiăng hluâ mê pế dâng 500 hnoăng hmê. Pakĭng mâu tíu gâk ngăn dêi cheăm mê ối ai mâu lêng dêi tơring xuân môi tiah dêi kong pơlê troh a cheăm veăng gâk kring’’.

Klêi kơ’nâi ai tơdroăng a cheăm, kuăn pơlê hiăng hdreăm hôu tơdroăng râng hnêa pĕng kơdê kuăn mơngế, pro xôi luât kân dêi mâu ngế kố, vâi xuân tối dêi pó thế mơdêk kơchăng, môi hiâm mơno rŭm môi tuăn rơtế khu râ kăn pơkuâ ƀă mâu khu cheăng gâk kring tơniăn thôn, pơlê ƀă pói vâ rĕng vêh tơniăn lĕm tiah hmâ tơdroăng rêh ối.

A rêm pơlê, thôn, kơtâu, ôh tá ai kơbố tối kơbố pơrá hbrâ kơchăng, tơrŭm ƀă khu cheăng pêi pro hnoăng cheăng, tối tơbleăng teăm tơdrêng drêng lơ ai mơngế tơmối tung pơlê. Pôa Nguyễn Thừa Đức, ối a thôn 22 cheăm Ea Ning, tơring Čư Kuin tối:

“Pakĭng pơtâng tối, mơhnhôk kuăn pơlê mê krê á xuân hiăng veăng kum môi iâ vâ rơtế ƀă khu kŏng an, lêng kuăn pơlê ƀă khu cheăng kal kí vâ rơtế veăng pơtrui rup mâu ngế xôi, pêi kêi đeăng hnoăng cheăng gak kring tơniăn tung pơlê cheăm ăm lĕm tro’’.

Mơhé cho mâu tơmeăm xah kâ lơ mâu kung kếo têa, kơhôp kơƀăn, laga rêm ngế kuăn pơlê pơrá pơtroh amê mâu tơdroăng tuăn pâ tá hiâm mơno, mơhnhôk kăn ƀô̆, mâu lêng dế pêi hnoăng cheăng. Nâ H’Nalin Mlô, ối a ƀuôn Pưk Prong, cheăm Ea Ning, tơring Čư Kuin tối:

“Vâi krâ kuăn pơlê tung pơlê nôkố rŭm môi tuăn, loi tơngah khât troăng hơlâ luât dêi Tơnêi têa, rak ngăn cheăng kâ tung rơpŏng. Ƀă tâng châ hlo mâu ngế ki nhôm mê tơbleăng ăm kơ koan tơnêi têa vâ tơrŭm pêi cheăng, gâk kring tơniăn tơnêi têa tung pơlê pơla’’.

Kô chiâng mơnhên cho tơdroăng kơtăng pơtrui rup, tơplâ mơdât ƀă hên troăng teăm tơdrêng ƀă châ tơƀrê, bu tung môi pơla môi iâ, hiăng tơniăn a mâu thôn, pơlê dêi cheăm Ea Tiêu, cheăm Ea Ktur. Xuân cho ing tơdroăng loi tơngah mê hiăng kum kuăn pơlê tơdjuôm ivá rơtế khu cheăng pơtrui rup mâu ngế xôi, chiâng khu parŏng krá tơniăn drêng djâ mâu kơhôp hmê tuăn pâ troh khu pêi cheăng a tíu gâk kring lơ tơdjuôm ivá veăng tơlo, veăng kum, tŏng kum rơpŏng kăn ƀô̆, mâu lêng, kuăn pơlê trâm xía vâ tung roh tơdroăng kố nah châ tơniăn tuăn.