VOV4.Xơ Đăng - Vâ mâu vâi muăn ki kơtiê a kơpong tíu tơkăng kong châ koh tơdah Têt Trung thu hơniâp ro, ai pơxúa, kơmăng lơ 9/9, Vi ƀan hnê ngăn kong pơlê Dak Lak hiăng tơkŭm tơdroăng xah hêi Kơmăng khế mơniâ hơnăm 2022 a tơring tíu tơkăng kong Ƀuôn Đôn.

Khu hnê mơhno diâp liăn hriâm ăm hok tro kơtiê mơ-eăm tơkâ luâ xahpá

A roh leh kố, ai lối 2 rơpâu ngế vâi o tung lâp tơring hiăng châ hmâng Hlá kơthô rơkâu Têt Trung thu ăm mâu vai o, vâi muăn dêi Kăn xiâm hnê ngăn tơnêi têa, mâu vâu o, vâi muăn ối châ râng on prôk lăm, châ ngăn xuâng prếo, mơđah hơdruê xuâng, pro pơroh Tăm Cuội - Nâ Hằng, kâ mâu kơ-ƀăn kĕo trung thu.

Xuâng prếo a kơmăng khế mơniâ

Drêng kố, Khu hnê mơhno hiăng tơkŭm diâp 64 kơxu kế tơmeăm ăm mâu vâi o vâi muăn kơtiê ki kơdo mơ-eăm tơkâ luâ xahpá; 30 toăng rơxế mái ăm mâu vâi o, vâi muăn hok tro ki xahpá tá hâi teăm ai rơxế mái troh a hngêi trung. Tơdroăng kố cho vâ tŏng kum tơ’lêi ăm vâi o ki rêh ối a kơpong tíu tơkăng kong Ƀuôn Đôn châ koh tơdah Têt Trung thu ki hơniâp ro, tơniăn; mơhnhôk mâu vâi o, vâi muăn kơdo mơ-eăm hriâm rơkê, châ điêm hên tung hơnăm hriâm nếo.

Nhat Lisa tơplôu ƀă tơbleăng