Klêi kơ'nâi tơmot chiâng môi, Khu tơrŭm mâu khu tơrŭm cheăng kong pơlê Dak Lak hiăng 'mâi mơnhông khu tơrŭm cheăng, nôkố ai 9 khu tơrŭm cheăng.  Rơtế ƀă rak vế mâu tơdroăng tơrŭm cheăng, Khu tơrŭm mơnhên tơdroăng ki kal hneăng hơnăm nếo cho po rơdâ tơrŭm cheăng lâp plâi tơnêi, hbrâ rơnáu tơdjêp khu tơrŭm cheăng, mơhnhôk kơxô̆ liăn tơtro ƀă tơdroăng púi vâ mơnhông dêi kong pơlê ƀă mơdêk tơƀrê tơdroăng cheăng dêi mâu khu tơrŭm cheăng.

Tung pơla hdrối kố nah, mâu khu tơrŭm cheăng hiăng rak vế tơdroăng tơrŭm cheăng pơla kuăn pơlê ƀă Lếo, Kul, Nhuk, Hàn Quốc, Ấn Độ ƀă hên mâu kong têa ki ê. Mâu tơdroăng cheăng kố veăng kum mơdêk hlê plĕng, tơrŭm pơla kuăn pơlê Dak Lak, Phú Yên ƀă mâu kong têa; tung mê, tơrŭm cheăng ƀă kong pơlê Mondulkiri dêi kong têa Kul veăng kum mơjiâng tơkăng kong hơniâp lĕm, tơrŭm.

Hơnăm kố, khu tơrŭm cheăng hiăng tơrŭm tơbleăng, pêi pro klêi 8 tơdroăng tŏng kum tơdrêng klêi kơ'nâi khía mơhot têa kân lân lu ing mâu khu tơrŭm cheăng kong têa ê, ƀă tâi tâng kơnâ lối 56 rơtal liăn.