Kŏng an kong pơlê Dak Lak tối ăm ‘nâi, lâp kong pơlê hiăng séa ngăn, chêh xo tơdroăng dêi 12.308 mô đô̆i hlâ tung tơplâ xâ, tung mê 5.458 mô đô̆i ki hlâ tung tơplâ xâ tá hâi châ mơnhên inâi. Ing séa ngăn nôkố ai 3.985 mô đô̆i ối nhŏng o chiâng vâ xo tơdah mauh ADN ƀă tâi tang kơxô̆ 4.346 ngế.

Tung rôh 1, kong pơlê hiăng châ xo lối 2.400 mauh sinh phẩm ADN. Tung rôh má 2 kố, tiô tối hdrối tơdah tơ’nôm 1.671 mauh. Vâ tơdroăng tơdah xo mâu châ tơƀrê, Kŏng an Dak Lak hiăng tơrŭm ƀă kơvâ cheăng, khu râ kăn pơkuâ kong pơlê séa ngăn rêm rôh, tơdrêng troh mâu rơpŏng vâ tơdah xo tơdroăng, hnê mơhno ƀă tiâ tối troăng pêi. Tơdroăng cheăng kố châ pêi pro inhên, xua rêm mauh ADN pơrá châ tơdroăng pói vâ tăng châ inâi, djâ mâu mô đô̆i vêh ƀă inâi ƀă rơpŏng.