Tơplôu: Katarina Nga/H’Xíu H’Mok/VOV Tây Nguyên
Sap ing khế 9/2025 troh nôkố, Khu râng liăn Tŏng gum kong pơlê Dak Lak tơdah xo vâ chê 605 rơtal liăn, hiăng xoăng ăm lối 434 rơtal liăn gum tơdrêng ƀă ‘mâi rơnêu mâu tơmeăm khoăng tơ’nhiê xua kong mê khía mơhot. Rơtế ƀă kơxô̆ liăn tŏng gum, Khu râng liăn “Xua vâ gum mâu kơtiê” kong pơlê hiăng ‘măn chôu lối 67 rơtal liăn gum pro, ‘mêng rơnêu hngêi ối ăm rơpŏng kơtiê, rơpŏng vâ chê kơtiê ƀă mâu rơpŏng ki pá puât.
A rôh trâm mâ, ai mâu khu mơdró kâ chêh inâi pơtối tŏng gum ăm Khu râng liăn “Xua vâ gum mâu kơtiê” tơdah xo râng ko, gum mâu rơpŏng kơtiê. Măt trâ̆n kong pơlê xuân tơbleăng ‘na túa tơbleăng mơhnhôk “Kăn ƀô̆, đảng viên, Kuăn pơlê xo râng ko rơpŏng xơpá” pơla hơnăm 2026 – 2030, tung mê, kơjo gum mâu cheăm ki malối xơpá, kơpong hdrông kuăn ngo.
Mâu khu mơdró kâ, khu tơrŭm, ngế krê châ mơhnhôk veăng tơlo gum liăn, hdrê pêt, tơmeăm xúa tung cheăng kâ, hnê cheăng pêi ƀă tăng cheăng pêi.
Rêm khu mơdró kâ chiâng vâ rơtế prôk ƀă môi lơ hên rơpŏng; hên tíu pêi cheăng xuân chiâng vâ rơtế tŏng gum môi rơpŏng. Măt trâ̆n kong pơlê kô pro tíu tơdjêp khu mơdró kâ ƀă mâu rơpŏng kal tŏng gum. Măt trâ̆n mâu cheăm, bêng tơrŭm séa ngăn, mơjiâng pro túa pơkâ tŏng gum ƀă séa ngăn mâu tơdroăng ki pêi pro a cheăm bêng; tơdrêng amê, hlối pro tơ’lêi hlâu vâ khu ki tŏng gum séa ngăn tơdrêng ki tơƀrê dêi ivá veăng gum.
Pôa Y Giang Gry Niê Knơng, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak, ăm ‘nâi, cheăng xo râng ko kô séa ngăn tung tơdroăng ki kơtiê, ƀă tơdroăng rơhêng vâ dêi rêm rơpŏng vâ rah xo túa vâ tŏng gum tơtro.
“Pin pơhlêh rơdêi túa tơmiât sap ing tŏng gum chiâng rơtế prôk mơnhông; sap ing diâp mâu kế tơmeăm chiâng tăng cheăng pêi kâ ton troh tá ah; sap ing tŏng gum môi xôh chiâng tŏng gum ai tíu, ai pơkâ pêi ƀă ai tơdroăng klêi kơ’nâi tŏng gum. Mâu khu mơdró kâ ôh tá xê to veăng tŏng gum ƀă kơxô̆ liăn mê ối athế mơdêk ivá rơdêi dêi tơná ‘na pơkuâ ngăn, kong ngê̆, kơchơ mdró, hnê cheăng pêi ƀă tŏng gum tơdroăng cheăng, hriăn ngăn tŏng gum, tơrŭm ƀă mâu rơpŏng kơtiê, rơpŏng hdrông kuăn ngo vâ tŏng gum túa rêh kâ ối tơniăn”.
Viết bình luận