Tối mơgêi kơxô̆ 430, hâi lơ 5/11 dêi Khu pơkuâ ngăn Tỉnh ủi Dak Lak hiăng môi tuăn troăng hơlâ kơjo gum ƀă tâi tâng kơxô̆ liăn tối hdrối vâ chê 15,5 rơtal liăn, ing mê pâ thế dêi Vi ƀan Pơkuâ cheăng dêi Vi ƀan Măt trật Tơnêi têa Việt Nam kong pơlê.

Kơxô̆ liăn tŏng gum pro hlâu vâ mâu kơpong kuăn pơlê tơkŭm po rôh kâ hmê tơdjuôm, gum kăn ƀô̆ ƀă kuăn pơlê trâm pá, thăm tơrŭm krá pơla pơlê pơla. Vi ƀan kuăn pơlê kong pơlê Dak Lak ai hnoăng pêi pro séa ngăn, xoăng tơdâng kơxô̆ liăn, thâ pro klêi hlá mơ-éa, tơniăn pơtroh kơxô̆ liăn kơjo gum troh mâu thôn, pơlê, tôh kuăn pơlê kơphô̆ hdrối hâi lơ 10/11.

Ƀă tơdroăng pơxá “Dak Lak - Tíu tơkŭm hên túa lĕm tro”, Măng tĭng Túa lĕm tro Tơrŭm môi tuăn tâi tâng kuăn pơlê hdroâng kuăn ngo kong pơlê Dak Lak kô po sap hâi lơ 17 troh hâi lơ 24/11, rơtế ƀă Hâi leh leh tơrŭm môi tuăn tâi tâng hdroâng kuăn ngo ƀă Hâi mơjiâng Măt trâ̆n Kuăn ngo Tơrŭm môi tơnêi têa Việt Nam hâi lơ 18/11.

Pôa Phạm Văn Bảy, Phŏ kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak ăm ‘nâi, tơdroăng hbrâ hâi leh a pơlê cheăm ối rơtế ƀă khĕn kơdeăn mâu kơpong kuăn pơlê ối pêi cheăng tơƀrê ƀă tơmâng mâu rơpŏng ki xơpá. Măt trâ̆n Tơnêi têa kong pơlê Dak Lak tối kô xoăng 2.330 kơxu tơmeăm hbru ăm rơpŏng kơtiê ƀă rơpŏng ai hnoăng tơnêi têa, rêm kơxu tơmeăm kơnâ 500.000 liăn.

“Mặt trâ̆n xuân hiăng hnê ăm mâu cheăm bêng tí tăng ngăn mâu thôn pơlê tung pơlê cheăm tơná vâ rah xo sap 1 troh 2 kơpong kuăn pơlê ki hiăng tơbrê pâ thế Măt trâ̆n khĕn kơdeăn kơpong kuăn pơlê ối ki hiăng xông tơƀrê. Pakĭng mê, tơbleăng ăm Khu pơkuâ ngăn Tỉnh ủi xoăng hnoăng cheăng ăm mâu mơngế tung mâu khu pơkuâ cheăng, mâu kăn tung Tỉnh ủi ki hiăng châ pơcháu cheăng mê kô pơkuâ môi pơlê troh veăng leh kơdeăn kơpong pêi cheăng xông tơƀrê, vâ kơjo gum ƀă hlối tơrŭm pơcháu hngêi pro tuăn pâ, xoăng tơmeăm ăm mâu rơpŏng kơtiê, xơpá tung rôh ki mê”.