A rôh tơpui tơno, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên, rơhêng vâ pơtối ‘mâi mơnhông, mơdêk rôh tơrŭm cheăng kố, vâ tơ’nôm hên ki kơnía ai pơxúa ƀă tơniăn ton ăm kuăn pơlê péa tơnêi têa. Tơrŭm cheăng kâ, tê mơdró ƀă ‘no liăn cheăng cho tơdroăng ki rơdêi khât, cho tơdroăng ki xiâm tơdjêp pơla péa tơnêi têa.

Việt Nam dế kơhnâ mơdêk vâ tơrŭm cheăng kố chiâng tơdâng tơ’mô tâ tung mâu hơnăm la ngiâ. Pôa Tô Lâm, Kăn xiâm pơkuâ hnê ngăn cheăng Đảng, kăn xiâm hnê ngăn tơnêi têa ăm ‘nâi Việt Nam tơhrâ rak vế tơniăn tơdroăng cheăng kal kí pơlê pơla, pro chiâng tơdroăng ki hmiân tuăn khât ăm mâu túa pơkâ ki ton xŏn dêi khu mơdró kâ; mơdêk rơdêi mơnhông troăng hơlâ, pơtối séa ngăn, pôe kơdroh mâu tơdroăng ki chêh pro hlá mơ-éa, tơleăng mơnhên mâu khât mâu tơdroăng ki tro kreăng vâ mơjiâng môi tíu tơrŭm cheăng tơdrăng, rak vế hnoăng pơxúa tro luât dêi mâu khu ki ‘no liăn cheăng; tơbleăng tŭm, tơniăn mâu on tơhrik, têa, troăng hyôh măng, tơnêi ƀă  mâu ngế cheăng.