Hơnăm kố, hâi leh châ tơkŭm po iâ ƀă Hâi mơhno túa lĕm tro Việt Nam lơ 24/11 ƀă mâu tơdroăng pêi pro Măng tĭng Túa lĕm tro - Tơrŭm môi tuăn dêi rơpó”. Pakĭng pro leh, mâu kơpong kuăn pơlê ối châ mơhnhôk pêi pro hên tơdroăng mơhno túa lĕm tro, hơdruê xuăng, tơ’noăng ivá, xah hêi tiô chal krâ ƀă malối cho “Rôh kâ hmê Tơrŭm môi tuăn dêi rơpó”, pro ai tơdroăng xah hêi ro, vâ chê, hmâ, vâ kuăn pơlê rơtế trâm dêi rơpó, thăm tơrŭm krá ƀă dêi rơpó pơla mâu pơlê.

Hdrối mê, hơnăm nah, kong pơlê Khánh Hòa kơjo kum kơpong kuăn pơlê ối 5 rơtuh liăn tơkŭm po hâi leh. Hơnăm kố, kơlo kơjo gum tâk luâ péa hdrôh, thăm tơ’lêi vâ mâu pơlê châ tơkŭm pêi hên tơdroăng xah ro, ai pơxúa, tơ’mot krâm kuăn pơlê veăng troh. Ing mâu hâi leh, mâu tơdroăng mơjiâng tơdroăng rêh ối tiô túa lĕm tro, mơnhông cheăng kâ, tơmâng khât ‘na rêh ối pơlê pơla ƀă mâu tơdroăng mơhnhôk tơ’noăng a kơpong kuăn pơlê ối châ hvái ngăn, khê̆n kơdeăn.

Kố cho rôh vâ râ Đảng ủi, mâu kăn trâm mâ, tơmâng tơpui tơno, tơdroăng púi vâ dêi kuăn pơlê, ‘mâi mơnhông tuăn loi ƀă rơtế achê pơla Đảng, mâu kăn ƀă kuăn pơlê, pơtối rak vế ki rơdêi tơrŭm môi tuăn dêi rơpó sap ing pơlê cheăm.