Tơdroăng tơkêa bro troăng kân ăm phêp rơxế kơtâu têi Quy Nhơn – Pleiku xŏn 125 km, 4 hơlâ troăng rơxế, tâi tâng kơlo liăn mơ’no 43.734 rơtal liăn, klâ chiâng 3 tơdroăng tơkêa bro hên tơmeăm xua Vi ƀan kong pơlê Gia Lai pro kơ koan ki xiâm; tiô tối hdrối kêi đeăng, chiâng xúa tung hơnăm 2029. Pôa Phạm Gia Túc, Phŏ Ngế pro xiâm hnê ngăn tơnêi têa hiăng ti tăng tơdrêng tơdroăng mơjiâng pro, tơdroăng tăng ƀăng tơnêi ƀă tơmeăm mơjiâng pro a péa tơmeăm ki mơjiâng pro XL01 ƀă XL02, ối tung Tơdroăng tơkêa bro Tơmeăm pro má 1.

Tung mê, tơmeăm pro XL02 kơnâ 2.000 rơtal liăn, hiăng châ lối 18% kơxô̆ tơdroăng cheăng, ối hrá tâng pơchông ƀă pơkâ pêi. Ƀă tơdroăng tơkêa bro tơmeăm má 2, tơnêi tơníu ngo ngối, ki rơhêng vâ tối péa troăng tung kơdâm tơnêi tơkâ ngo An Khê ƀă ‘Mang Yang, tâi tâng ki xŏn dâng 5,75km, châ pơkâ kơtăng ‘na kih thuât mơjiâng pro. Phŏ Ngế pro xiâm hnê ngăn tơnêi têa pơkâ mâu tíu cheăng hbrâ tah lôi pá puât tung po troăng châ achê péa troăng kơdâm tơnêi, pơto tơmeăm ƀă mơhnhôk tŭm mơngế pêi cheăng, tơmeăm mơjiâng pro.