Vi ƀan hnê ngăn kuăn pơlê dêi kong pơlê Lâm Đồng pơkâ thế  mâu tíu pêi cheăng, kơvâ cheăng ƀă mâu kăn 124 to cheăm, bêng, kơpong Phú Qúy đi đo tơmâng vâ ‘nâi mâu tơdroăng nếo ai tơbleăng hdrối, ăm ‘nâi ‘na kong prâi; teăm pêi tơdrêng ‘na tơbleăng ăm kuăn pơlê ‘nâi vâ hbrâ ví xía vâ, tơniăn ăm kuăn mơngế ƀă kế tơmeăm.

Khu râ pơkuâ cheăng tơmâng tăng ngăn mâu kơpong kuăn pơlê ối kĭng têa kơxĭ, kĭng têa kroăng, têa krông, kơpong klong ƀă mâu kơpong ki rơ-iô tơ’lêi tro têa lu, têa rơlêa, tơnêi tơhnâp. Khi pơkuâ hbrâ ví xía vâ dêi kong pơlê tơkŭm gak ngăn plâ hâi măng, pơtối tơdah mâu tơdroăng ‘na kong prâi ôh tá tơniăn ing Tổng đài 112; hbrâ tŭm mơngế, rơxế, plong, ếo chhá tơmeăm tiô tơdroăng pơkâ pêi pro “4 tơdroăng amê”, hbrâ tơbleăng tŏng gum drêng ai tơdroăng ôh tá tơniăn.

-Drêng kong mê kân, Vi ƀan hnê ngăn kong pơlê Dak Lak tối tơbleăng rĕng kơxô̆ 6, pơkâ thế mâu tíu pêi cheăng, tơring cheăm hbrâ rơnáu tơbleăng mâu troăng hơlâ hbrâ ví ƀă kong mê kân, têa lân lu ƀă tơnêi tơhnah tơhnâp.

Kong pơlê pơkâ thế mâu cheăm bêng séa ngăn mâu tíu ki hiăng tơ’nhiê a kĭng têa kroăng, têa plông, kơpong thông trâu, kơpong ki mơni tơ’lêi tro tơhnah tơhnâp vâ ‘mâi xê̆n kuăn pơlê lăm ối tíu ê. Mâu mố đô̆i, kŏng an hbrâ tŭm  mâu ngế cheăng, rơxế tŏng xo maua ngế ki hliăng tiâ; tơkŭm gâk a mâu tíu ki thông, têa plêng plế, khŏm pôi tá ăm ngế ki lâi ƀă rơxế tơmeăm ki lâi prôk tơkâ luâ kơpong rơ-iêo.

Kăn pơkuâ kong pơlê Dak Lak pơkâ thế mâu ngế ki pơkuâ ngăn long, rơchoâ têa, hngêi kơmăi on tơhrik pêi pro kơtăng tơdroăng ki mơ’no têa, vâ tơniăn mâu long rơchoâ ƀă kơpong peăng hdroh. Kăn pơkuâ mâu cheăm bêng ƀă mâu tíu pêi cheăng ki ai tơdjâk troh hbrâ rơnáu túa pơkâ, kế kâ, tơmeăm xúa ƀă liăn ngân vâ gum kuăn pơlê drêng ‘mâi xê̆n ối tíu tơniăn, xua kong mê khía mơhot têa kân lân lu.