Kơxê măng hâi lơ 9/11 jâ Takaichi Sanae, Ngế pro xiâm hnê ngăn kong têa Nhuk hiăng pơkuâ leh kân krip tơdah kơ pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa, klêi leh tơdah, Ngế pro xiâm hnê ngăn kong têa Nhuk ƀă Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkuâ djâ mâu kăn xiâm péa tơnêi têa hôp tơpui tơno.

Việt Nam ƀă Nhuk mơjiâng tơrŭm cheăng tơpui kâ péa tơnêi têa hơnăm 1973. Tơkâ luâ lối 50 hơnăm tơrŭm ƀă hlối mơnhông, tơdroăng tơrŭm cheăng pơla Việt Nam ƀă Nhuk ôh tá la lâi pơtê, đi đo ‘mâi mơnhông tung tŭm tơdroăng cheăng. Nhuk cho môi tung mâu kong têa tơrŭm cheăng kâ ki kal má môi ƀă cho kong têa ki kơjo gum ODA hên má môi ăm Việt Nam.

Rế ai hên khu mơdró Nhuk ‘no liăn pêi cheăng tung tơdroăng kơvâ xúa kong ngĕ ki dâi lĕm, malối cho tuăn ngôa rơkê (AI), tơmâng khât ƀă po rơdâ pêi cheăng a Việt Nam. Vâ tối tơrŭm cheăng pơla Việt Nam Nhuk dế a rôh mơnhông tơƀrê lĕm má môi, loi nhoăm dêi rơpó ‘na tơdroăng kal kí. Nhuk hâk vâ veăng môi tuăn ƀă Việt Nam ‘na tơdroăng mâu hneăng hôp tơpui tơno pơla péa pâ ƀă hên pâ.

Hneăng lăm pôu Nhuk dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa châ tơngah kô mơdêk tơdroăng pêi pro nhên mâu tơdroăng tơhrâ ki châ pơla mâu kăn xiâm péa pâ hiăng tơpui rơhéa mâu tơdroăng pêi pro, tơdroăng tơkêa bro tơrŭm mơnhông cheăng ai pơxúa tung hên kơvâ cheăng. Ing mê, hneăng lăm pôu kô veăng ‘no hnoăng pêi pro a mâu tơdroăng pơkâ mơnhông dêi tơrêm tơnêi têa, xuân môi tiah hơniâp lĕm, tơrŭm tơrôa ƀă mơnhông a kơpong ƀă tung lâp plâi tơnêi.