Tung ƀai tŏn chêng koăng krếo mơhúa báu tum, idrâp dêi mâu ngê̆ nhân cheăm Ia Sao rơtế ƀă rơkong hơdruê dêi Ngê̆ sih Ưu tú Cao Minh, vêh mơhno tơdroăng ki hâk phiu kâ báu nếo dêi mơngế Jarai. Ing tơdroăng ro kâ hên báu, tơdroăng kố ối djâ tơmối troh a têa kơneăng dêi pơlê ing ƀai tŏn chêng koăng Djâ têa vêh a pơlê dêi ngê̆ nhân pơlê Mrông Yố, cheăm Ia Phí. Mâu ki tŏn vêh mơhno túa lĕm tro tŏn chêng koăng ăm hlo idrâp chêng koăng hmâ ƀă tâi tâng mâu tơdroăng cheăng ƀă rak vế tíu ối ôh tá tơniăn pơhlêh tung tơdroăng rêh ối pơlê pơla Tây Nguyên.

Xuân a kong măng po mơdĭng, Kơtum chêng Kơ Đơ châ tơdah troh a tíu tơbleăng tung po po mơdĭng pơ-ôu pơ-eăng Tơmeăm kơnía dêi Tơnêi têa. Kơtum chêng ai 8 to, ối tung khu chêng krê dêi mơngế Jarai hmâ tŏn tung rôh pơkoăng, mơdĭng to hngêi nếo lơ rơkâu xối ăm ivá mo sêi. Hdrối vâ châ Tíu ‘măn tơmeăm Pleiku tăng tơkŭm a hơnăm 1997, kơtum chêng hiăng châ môi rơpŏng a ƀuôn Broăi, cheăm Ea Tul, rak ing hên chal. Hâi lơ 3/2/2026, Ngế pro xiâm hnê ngăn Chin phuh mơnhên Kơtum chêng Kơ Đơ cho tơmeăm kơnía dêi tơnêi têa.

Tơpui a kong măng po mơdĭng, pôa Phạm Anh Tuấn, Phŏ kăn pơkuâ ngăn Đảng kong pơlê, Kăn hnê ngăn Vi ƀan kong pơlê Gia Lai, tối nhên ki kal tung tơdroăng ki hnê pơtó mâu ƀai chêng ton nah ăm rơxông nôkố ƀă pro tơ’nôm ivá ăm mâu kuăn pơlê dế rak vế tơmeăm khoăng kơnía git.

“Ƀlêi chiâng dêi cheăng rak vế, ôh tá xê to châ mơhno ƀă mâu hâi po mơdĭng ki kân mê ƀă tơdroăng ki klêi kơ’nâi po mơdĭng ai to lâi to ƀai tŏn chêng koăng chal nah châ rak vế, to lâi ngế ngê̆ nhân ai ngế pơtó ƀă to ngế hơnăm ối nếo hâk tơngăm pơtó túa lĕm tro dêi pâ pôa. Gia Lai rơhêng vâ túa lĕm tro chiâng ivá ăm mơnhông krá tơniăn, vâ ôm hyô túa lĕm tro, ôm hyô pơlê pơla mơdêk túa rêh kâ ối ăm pơlê pơla, vâ túa lĕm tro châ nhuô̆m tâ ƀă xua kuăn pơlê rak vế tơmeăm kơnía git châ pơxúa sap ing mâu tơmeăm kơnía git mê”.