Klêi kơ’nâi lối 5 khế mơjiâng pro, 2 toăng hngêi câp 4 hiăng kêi đeăng, pơcháu ăm rơpŏng jâ H’Bdia Ƀkrông, ối a ƀuôn Drang Phốk ƀă rơpŏng pôa Y Căn Na Đy Hra, ối a ƀuôn Trí. Rêm toăng hngêi ai ƀăng deăng dâng 60 met karê. Tung mê, hngêi jâ H’ Bdia Ƀkrông ai kơxô̆ liăn mơjiâng pro 110 rơtuh liăn, hngêi pôa Y Căn Na Đy Hra cho 120 rơtuh liăn.

Rêm rơpŏng châ tŏng gum 80 rơtuh liăn; ki ê xua rơpŏng, nhŏng o ƀă pú hmâ veăng tơlo. Kăn ƀô̆, mâu mô đô̆i Đông gâk tơkăng kong Srê Pốk ƀă Đông mô đô̆i gâk tơkăng kong Bo Heng tŏng gum hâi pêi mơjiâng pro. A rôh pơcháu, Đăi tă Rơ Lan Ngân, Phŏ Chính ủi Khu pơkuâ Mô đô̆i gâk tơkăng kong kong pơlê Dak Lak, tối rơdêi, tŏng gum tơdroăng rêh ối kuăn pơlê cho tơdroăng pêi ki kal khât gum pro krá ihiâm mơno kuăn pơlê, mơjiâng kơpong tơkăng kong krá ó rơdêi.

Tơdrêng amê, pói vâ mâu rơpŏng pơtối mơ-eăm pêi cheăng pêt mơjiâng tơmeăm, mơnhông cheăng kâ, thăm veăng rơtế khu râ kăn pơkuâ ƀă mô đô̆i Gâk tơkăng kong veăng gâk kring hnoăng pơkuâ, gâk kring tơkăng kong tơnêi têa.