Xông tơpui a rôh trâm mâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên kố cho rôh hvái ngăn mâu tơdroăng châ tơƀrê ƀă tơpui tơno ‘na mâu troăng prôk la ngiâ, pơkâ ki xiâm tung tơdjêp tuăn ngôa rơkê, túa ki rơkê tơtro, mơngế pêi cheăng kơxô̆ liăn ‘no cheăng Việt Nam ƀă pơlê pơla mơngế ki rơkê mơngế Việt Nam a kong têa Nhuk.

Tơrŭm cheăng ton xŏn tâi tâng Việt Nam - Nhuk dế a hneăng mơnhông lĕm tro, păng ‘nâng ƀă châ tơƀrê, tung mê khoa hok, kŏng ngê̆, pơhlêh nếo tơmiât pêi rơkê chiâng môi tung mâu tíu xiâm tơrŭm cheăng nếo dêi péa tơnêi têa. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên pói vâ pơtối ai hên rôh tơmâng tơdroăng ki tơpui tối túa ki rơkê tơtro hriăn plĕng, xúa khoa hok dêi mâu ngế cheăng khoa hok; pơkâ thế mâu ngế ki rơkê, ngế cheăng khoa hok pơtối hriăn plĕng, veăng gum păng ‘nâng ăm tơdroăng mơnhông dêi tơnêi têa, xuân môi tiah veăng gum hên ăm tơrŭm cheăng lĕm tro pơla Việt Nam ƀă Nhuk.