Klêi kơ’nâi môi hơnăm pêi pro tơdroăng ki mơdêk rơdêi hriâm tâp ƀă pêi tiô troăng tơdjâ, hiâm mơno túa rêh ối Hồ Chí Minh, cheăm pro kăch măng Ea M’Droh, kong pơlê Dak Lak tơkŭm tơbleăng péa túa pơkâ pêi: “Păn chu tơnêi ƀă pêi tơdroăng kơdĭng”, “Rêm chi ƀô̆ rơtế tŏng gum rơpŏng kuăn pơlê hluăn ing kơtiê”. Kăn ƀô̆, đảng viên veăng tơlo liăn vâ kơdĭng, mâu chi ƀô̆ xo tŏng gum rêm rơpŏng ƀă mâu tơdroăng cheăng pêi ki nhên.

Tung hơnăm hdrối nah, cheăng kơdĭng 1.000 liăn môi ngế môi hâi hiăng châ lối 99 rơtuh liăn. Túa păn chu tơnêi hơnăm 2025 mơhnhôk veăng tơlo châ vâ chê 128 rơtuh liăn. Tơrŭm ƀă mâu kơxô̆ liăn veăng tơlo ki ê, cheăm Ea M’Droh hiăng pro 5 túa cheăng kâ, pro nếo ƀă ‘mêng 5 toăng hngêi ki ton, tŏng gum 11 rơpŏng kuăn pơlê.

A rôh hôp hâi lơ 12/11, teăng mâ 27 to chi ƀô̆ tung Đảng ƀô̆ cheăm tơkŭm pâm chu tơnêi hơnăm 2026, châ xo lối 152 rơtuh liăn. Mâu kơxô̆ liăn ki veăng gum ki kŭn châ gô̆m chiâng kơxô̆ liăn vâ gum mâu ngế xơpá. Pôa Nguyễn Văn Hào, Ngé pơkuâ thôn Hiệp Kết, cheăm Ea M’Droh tối.

“Túa păn chu tơnêi kố cho túa pêi ki tro ‘ló, rêm ngế kuăn pơlê bu kal kơdĭng môi hâi 1.000 liăn tê mê hiăng châ kơxô̆ liăn hên tiah kố vâ tŏng gum mâu ngế xơpá, ngế kơtiê ôh tá ai kuăn ‘nĕng păn rak, pro tơ’lêi hlâu tŏng gum vâi vâ tơkâ luâ mâu tơdroăng xơpá tung rêh ối. Á hlo túa pêi kố xuân chiâng vâ tơdjâk troh lâp lu tâ”.

Rơtế ƀă veăng tơlo gum liăn kơdĭng, cheăm Ea M’Droh pơkâ pêi “Rêm chi ƀô̆ rơtế ƀă rơpŏng kuăn pơlê hluăn ing kơtiê” a 4 chi ƀô̆: Mâu kơ koan Đảng, Vi ƀan hnê ngăn cheăm, Kŏng an ƀă Mố đô̆i. Rêm chi ƀô̆ xo gum iâ hlái môi rơpŏng, tăng ‘nâi tơdroăng têh ối vâ rah xo túa ki tŏng gum. Ai rơpŏng ki ‘nâ châ gum ăm ro hdrê, pro ăm hngêi; ai rơpŏng ki ‘nâ châ đảng viên ăm mung tơnêi pêi chiâk vâ châ tơ’nôm liăn.

Pôa Trần Doãn Tới, Kăn pơkuâ Đảng cheăm Ea M’Droh ăm ‘nâi, klêi kơ’nâi mơgêi, cheăm po rơdâ túa pêi chiâng rêm khu tơrŭm, khu mơdró kâ rơtế prôk ƀă rơpŏng kơtiê.

“Sap ing túa pơkâ pêi mê ngin pơkâ po rơdâ, ôh tá xê to khu tơrŭm Đảng ối tung khu pơkuâ ngăn Đảng mê troh a mâu khu tơrŭm tiô khôp, mâu khu mơdró kâ, mâu khu ki ai hiâm mơno hơ-ui, ngế krê tung cheăm ƀă a mâu cheăm ki ê, tung kong pơlê ƀă a mâu kong pơlê ki ê vâ rơtế veăng gum ăm cheăm Ea M’Droh pêi klêi Pơkâ Hneăng hôp kân Đảng ƀô̆ cheăm rôh má môi cho troh hơnám 2030 cheăm Ea M’Droh kô ôh tá ai xếo rơpŏng kơtiê ƀă vâ chê kơtiê”.